nedjelja, 13. listopada 2019.

Željko Bilankov | Ariva je brod


(2 priča pisana pretežno šoltanskim dijalektom)

Blizu smo Rogača, govori mater, a osmih joj krasi lipo lice. Obukla mi je džemperić, počešjala kosicu i uvatila za ruku. Gremo prema izlazu iz broda, tiskajući se meju sviton, a Bakar samo ča ni ariva. Šušur je i vanka na rivi, svak gleda ne bi li vidi nikog svog. Mi polako gazimo priko drvene skale, mater me čapala čvrsto i napokon, moje su noge prve stale na mul. Čekaj Žele, zaustavila me, jerbo san se ti zatrčat od sriće. Ona mlada, u lipoj vešti, koju je sama šila, sa punom boršom, ja ka iz dičjeg figurina, pa put pod noge. Vaja nan strmin Docem prema Brdu, kad ono, koga mi to vidimo?!

Mater je znala, ali mi ni tila reć, tila je da iznenađenje bude radost u mojen srcu... i bilo je, isprid nas, odjednom se stvori moj dido sa tovarčićem Miškom. Poleti san didu u zagrljaj, a on me, onako visok i krupan, vaze i diga do neba. Pojubija ga, on prvo mene, pa onda mamu, a ja san vidi suze u njiovin očiman. Pogladi sam dragog Miška, po nogan i po repu, prin nego me dido se, na njegov samar. Ajme gušta, jašem tovarčića, dok me oni pridržavaju i veselo prepričavaju prošle dane. Bome se i Miško uspuha, ni mu bidnom lako penjat se takon uzbrdicon, pa san ga pomilova po grivi, prisritan, ča ću nakon toliko dan u Splitu, jopet doć tamo di me srce vuče. Napokon, eto nas na Brdu,..u kasno jesenje popodne, svitla iza ponistri prvih kuć Grohota, šire niku nesvakidašnju teplinu. Puten do didove i bakine kuće, morali smo proć blizu crikve, posrid sela, u ono vrime, pripunog svita. Svi su me znali, pa niki nisu mogli odolit da me ne dotaknu ili poškakju i pitaju, kako si kumpare, vidi ga, ča je smišan, kako ti je Žele u Splitu? Dok smo, majka, dido i tovarčić s menon, polako koračali prima Vratića putu, baka i teta nestrpjivo su nas čekali doma. Moga san se samo nadat da će me, ka i puno put prin, razveselit lupari, koje mi je dido ujutro ubra na izvanju i lipi vonj pečenih pečurvi...i nisan se privari, jubav prima meni, njihovu prvemu unuku i danas me sića na ono nezaboravno vrime, kad se imalo malo, a dililo iz duše!

Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.