Kolumne

nedjelja, 9. travnja 2017.

Katarina Zadrija | Po Zagorju voukvoukolič


Ljudi dragi rada bi vam povedala kak je meni , zutra bu već teden dana rit pota vidla.

Je, dobre ste prečitali, rit pota vidla. Nas su v škole vučili da se ne veli rit pota vidla, neg izlet.

Dok sem došla z škole doma i pofalila se : «Idemo na izlet!» , babica je rekla : Kej pakučiteljeva rit oče pota videti?».

Nas su vučili da se veli izlet, našu decu da idu na ekskurziju, a denes se se više pripoveda, kak penzjoneri idu na nekakvu sekskurziju. To vam pak nemrem povedati kej je, kej još nes penzionerka, pak nes imela priliku to videti.

I tak da se vrnem na svoju pripovetku. Pred tri tedne je prinam v gurica bila meša pri respelu, pri Sv. Mihovilu. Pozvala sem si i svoju kumicu z Poljane na proščenje. No, kak smo mi ženske navek doma i same delamo, a naši si muški rada veselja najdu, velim ja kumice :

»Čuj ideš z domlju za dva tedne v Stubicu, tam je semenj stari sorti vočki, a dok bumonazaj išle bumo stale pri Majke Božje?» .

«Kak ne? Rada bi išla.»

Vele da je semenj, ali nemre biti semenj kej si bi na semnju mogli neke kupiti, a oni same izlažeju. Ja bi rekla da je to nekakve spravišče.

I tak sem vam se ja prošlu sobotu rane digla, kej sem se po hiže poredila, obeda skuhala, danedu ovi moji muški pokrepali od glada, skočila v traperice, tenesice i majicu, vužgala passatai na Poljanu po moju kumicu. Male sem i kesnela, kumica me već na ljese čekala.

I tak smo mi prek ovi naši Prigorski sel, prek  Gornjega Orešja, Prepolna i Žitomira vlezle vZagorje. Otpravile smo se prek Majke Božje i Zlatar Bistrice po glavnem potu v Stubicu.

Je, se bi to bile dobre, ali Hrvatske ceste još nesu završile cestu koju su i lani delale dok semišla v Stubicu. Oni to se delaju polake, kak usporeni film, imaju preveč penez, zate kej smo mi sad kak Mala Švicarska i ne zna se kam z penezi, zate se tak doge dela kej bi se ti penezi potrošili. Ljepe piše Obilazek. Je, a kej sad, če se mora, mora se. I otpravile smo se mi po tomu obilazku vokvokolič. Dobre ste prečitali vokvokolič. Dok sem babice nega povedala da sem nekam išla okolo, ona je rekla ne veli se okolo, neg vokvokolič.

Došle smo mi i do Zaboka. Baš nam je bile ljepe, polaku sem vojzila, kej smo se polja, šume i vrte pregledale. Obodve smo poreklom Zagorke spodi Ivančice, i baš nam je pasale takvokvokolič se vojziti.

Je, dok smo mi pregledavale vrte i šume i polja, ni jenu tablu na potu nesmo zagledale. I tak najemput na teble piše Sv.Križ. Začretje!

Isusek kumica pak mi v Sloveniju idemo!

A kej, sad se same obrni natrag.

I tak smo se mi vrnole, prešle Zaboka i našle taj Obilazek. EJ! Mam se bila na konju! Tu pak se mam poznam. Jesmo se mi vojzile dve vure mesto dvadest minoti kulike mene do Stubice treba, ali nam ne bile krive. Naspominjale smo se o semu, tak se već doge nesmo vidle.

I stigle smo na to spravišče. Sega smo ljepoga vidle i ljepi grad Golubovec Stubički. Škoda kej je zapuščeni. Nemaju ga š čem obnoviti. Nekaj si mislim kej ovi naši Zagorci ne prose peneze v Hrvatski cesta za grada obnoviti, oni tak ne znaju kam bi z penezi.

Već je i obedu bila doba. Rada bi si pojela pečenoga pevčeka, rožaka po prigorski, pečene češnjovke, kotlovinu z restanim kromperom i šalatu, pak zaljejati z domačem Zagorskem gemištem, meni same kiselu vodu da me ne bi Organi (reda) haltali.

Kak smo mi tam bile stranjske nesmo znale je li koja bertija kej nudi, pak smo prešle prema Majke Božja. Tam je pone proščenjarov, pak i sega za jesti ima.

Nejdemo više po tem Obizaleku, rajši bomo išle prečki.

Je, ali vidiš vraga !

I po prečki piše Obilazek! Dobre Zagorci kej je vam? Em ste vi navek išli ravne, niti leve niti desne, same ravne, a sad furt obilazite?!

Vojzimo se mi poprečki po obilazku i iščemo potnu tablu. Nigde ni jene.

Skremen ja na jenem križanju ljeve, pa kaj bu, bu, dojdem do pruge i piše „Željeznička Postaja Poznanovec“. Isusek presvetli, sad znam de sem. Z Poznanovca smo za čas bile na Bistrice.

Prek pota cerkve šator. Trže se čevapi, kak da smo na Baščaršije, hambugeri, kak da smo Američka kolonija, a ne Neovisna država. Pitam kej imaju domačega za pojesti. Veli ženska same kotlovinu i pečene kobase. Da je to bar bila kotlovina. Lokoti pečeni v kotlu v pone olja, bez ajvara, luka i sega onoga dobroga kej se vu saft meče. Več je bile pone vur, rada bi si neke na brzinu pojele. Treba je bile dimam iti. Nema mesa z masti z banje, nema ocvirkov v kruhu, nema pečeni češnjovki. Veli pečeno samo kranjske i debrecinke. Dobre, zele smo si mi debrecinke, bile su fine. Veli gospa kej je peče, fine su,se je to roba od velikoga Hrvata. Je dobre, navek smo si mi kajkavci z Hrvati bili dobri, ali ja bi nekak rajši da je taj pajcek gore po bregu bežal prije nek su ga v kobase deli, da je po prav domači.

Bile smo i v cerkve, pomolile se majčice. Štela sem si curičke igračku pravu Bistričku kupiti.

Kupila sem je konje i kola. Vele da je Bistričke igračke zaštitil UNESCO. To vam je jenasvetske bumo rekli udruga, kej bi se tobože trebala starati za kulturu, umetnost, decu i kej ti ja znam kej se. Če je taj Unesco zaštitil naše igračke, zake onda male dalje ima Kinez štand i prodaje bistričke igračke napravljene negde v nekakvomu Hogkogjangui? To me baš rasrdile.

Tak da sem si senjek jenoga gemišta popila.

I tak, krenule smo polake dimam, srečne i vesele.

Ste vidli moški kak je nam babam male za sreču treba?

Autor fotografija: Katarina Zadrija

Nema komentara :

Objavi komentar