petak, 25. rujna 2020.

Kajkavsko najže (3): Dok trlica trlanji...

Piše: Aleksandar Horvat

Če je najže preveč puno, nemaš kud prejti, moraš furt premetati z jednoga kupa na drugi. Pri jeni takvi spelanciji mi je posebno smetal nekakvi stalek na četiri noge. Dok sem razmetal fkraj vse kaj je po njemu viselo, pogledam malo bole - trlica. O, ti bokca, gda mi je to čez glavu preletelo, ono... dok se najemput nečega zmislite na kaj ste čistam pozabili, kaj vam je zdavnja zvetrilo z glave. Kak sem pomislil, tak je mom nastavilo negdi v preteklosti klepatati kak noro… tak-tak-tak-tak-tak. A ja sitni, slinavi i zamusikani, sev zamotani v kudelju… no, idemo rajši po redu.

Bri moji baki, v ono vreme dok sam ja bil mali, je na selu konoplja bila jako važna (poglečte kaj sem več o tomu pisal na Kvaki: Zgublena robačka). Moji su konoplju meli na jedni njivi i to su zvali “keneplje”, z naglaskom na drugi e. Dok bi se pokošena konoplja dobro namočila i potlam posušila onda bi počela tortura. Stupa, stepača, trlica, greben... Ide još tu posle preslica, kolovrat, snovača i tak dalje, ali moji su na selu bili poljoprivreda, oni su delali samo do grebena. A neko drugi se je bavil z finim poslima.

Još malo konopljanske teorije, čisto kaj vas fputim. Stupa je bila kak žmefki drveni Pozojev gobec, imela je zobe i tirali su ju z nogom. V gobec bi nametali snoplje odmočene i posušene konoplje pak bi ju grizli, “stupali” po stupi, tak kaj se je vsa konoplja zdrobila, ali one fine lasi su bile žilave i ostale su cele. Na to dojde stepača, to je bilo kak veliki drveni nož ili mač, z kojim bi tokli po tomu zdrobljenomu snoplju i z njega “stepli” one zdrobljene drvene ostanjke od konopljine kore (pozder) kaj su stupi vušli. To je komaj v grubo napravilo posla, ali još je ne bilo gotovo. Če bi stepaču s prednjim krajem zacvikali med dve deščice dobili bi otprilike trlicu. Stepeno snoplje se prevlačilo čez trlicu, dok se ona stiskala gori doli z onim nožom med deščice. Ostanjki pozdera su pocali, a fine niti su se samo previjale, njih je ne bilo moči ftrči. Ve su vlakna bila još lepša, ali za kraj su se prevlačila čez greben, desku z koje su na gosteše ili ređeše štrčali železni klini. Čez to se konoplja česala, tu je zadnji najsitneši pozder otpal i ostala su samo vlakna kak lasi i to tri vrste po finoči. Najdokša, najlepša i najfineša su se zvala povesmo. Z toga se delalo platno za obleke. Druga klas, malo krajše i grubeše lasi su bile kudelja, z njih su se delali stoljnaki i plafte. A treča klas, one najkrajše i najgrubeše, pod imenom turjača, su ostale za vreče, štrike i ponjave za živinu. Moji su tak obdelanu konoplju lifrali dalje, gde su nekoji drugi preli, tkali i tak dale. Ova tehnika je isto tak vredila i za lan.

Izvor: Podravske širine
E, ve da se vrnemo na trlicu. Od cele te mehanizacije i drvenarije, trlica je sima išla najbole na jetra. Teško je z njom bilo delati, a čula se je do pol sela. Još dok jih je bilo više na kupu, jedva se čekalo da sezona konoplje prejde. A trlica kak trlica, bila je jeden čist prosti izum. Dve deščice za prst razdvojene, a med njima treča, z jene strane r ručkom, a z druge z klinom z koji se držala za ove deščice, i onda se, držeč’ za ručku z trlicom “cepalo” gori doli tak kaj bi te gornji nož, ili trlec, išel med ove dve deščice kak škare. Baš tak, dok bi tu del snopek konoplje, delal bi se kak da ga hočeš preseči. Presekel bi i zdrobil se ono trdo, jedino bi se fina konopljina vlakna samo sukala i cela bi ostala. Konoplja se “trla”, od tud i naziv trlica. Trlica je bila tak prosta da ju je bilo lefko popraviti bez preveč mudrosti. Nekoji su imeli samo te tri deščice, najbolje od hrasta, kajti su najduže trajale i teže su se habale, koje bi deli na stol i onda trli konoplju ili lana. Kak je to po stolu moglo i bežati sim tam, znali su ljudi dva debele kolce ili stupe zabiti v zemlu. Na vrhu su imeli škraku ili napravljenoga utora v koji bi trlica legla, tak da je ne mogla bežati. Ali problem je bil kaj ju se neje moglo premeščati. A nekoji su si fest dali truda pak bi trlicu napravili skupa s postoljem na tri ili četiri noge, a na nekoje se je čak moglo i sesti kak na cujzeka. Z njom si mogel kam očeš i gda očeš, a bila je dost žmefka kaj se nije migala i prehitavala. Najjakši gazde su postolja čak dali zrezbariti i po tomu se vidlo kak je trlica bila kraljica ned tom drvenom mehanikom.

Evo, to smo rešili. A trlica, zato kaj je bila takva kakva je bila, je v narodu zaživela i na druge načine, furt je med ljudima, čak i med onima kaj su za trlicu nigdar ne čuli niti su ju vidli. Z tem kak trlica zgledi i kak fercera su povezane i druge reči... strti, potrti, spotrti, zatrti koje ne rabimo više samo za konoplju, nego je više kak metafora ili usporedba z kojom se šalimo ili z nekoga norca delamo. Celi den sam kopal gorice, sev sem spotrti. Seme su jim zatrli. Vrč se je potrl. Samo me zafrkavaj, ve ti gopca spoterem. Za onoga koji puno govori i nemreš ga zastaviti se veli ta govori furt kak trlica, trlanji ili trlanče. Više je to išlo ženske neg muške. Cela štorija je po tomu kaj su trlice po cele dane klepetale po selu, nije bilo baš preveč predaha jer je posel ne mogel čekati, a konoplje je bilo puno. Dok su trlice počele, više su se ne zastavljale i trlanjile su furt jeno te isto.

Još je jena stvar o trlici, a to je da je bila tak prosta, od tenkih deščici pak je neretko služila i za takvu usporedbu. Če bi gdo bil jako slabo prihranjeni, reklo bi se da je mršavi, tenki, suhi ili guravi kak trlica. Viš' sinek, to ti je prava jaka ženska za te, a ne ova trlica Čikorova. Na račun te proste konstrukcije su neretko i negdašnje male aute zvali trlice od miline ili kaj bi se norca delali. Vozil sem, “jugića, “peglicu” i “fičeka”, ve sam si kupil velkoga Opela jer nemrem više voziti te trlice. Našel sam da ima i izreka da je negdo gladen kak trlica, zato kaj trlicu furt hraniš, a nigdar ju ne nahraniš. Trlica je završila i na estradi, kajti su dečki z Korni grupe 70. leta starinsku poslovicu uglazbili v pesmu Trla baba lan, da joj prođe dan. Tu pesmu su i stranjski popevači na svoji jezikuma popevali i tak je trlica postala mednarodna stvar. I den denes, za prazne reči z kojih se nikaj ne zlegne niti se kaj z njih zezna, dok se govori samo zato kaj bi se govorilo ili je kaj dosadnog i ponavljajuče velimo - “trla baba lan”.

Naša pesnikinja B. Jelušić, ne jenem mestu piše o trlici z kojom na isti kup nameče persone kaj v neznanju preveč i jalovo mudruju, soliju pamet i sam ljude žifciraju i vreme jim kradeju, pak onda završi vu svojem stilu, kak bi ona rekla - "zaključno":

K vragu, trlica bu trla,
pamet bude hmrla,
gda bu mrak do grla,
ne bu se dodrla…..

(A. Horvat, 2020)

Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.