ponedjeljak, 24. kolovoza 2020.

Kajkavsko najže (2): Raspopevani lampaš

Piše: Aleksandar Horvat

Na kajkavskem najži sem našel lampaša. Ali ne onoga na kojega vi mislite. Našel sem zaprav pesmu o lampašu.

Da bi si zamislil kak je lampaš zgledal, videl bi ga na zid obešenoga, na dolnjem kraju je mala plehnata piksa z petrolinom, na njezinom vrhu je našarafljeni plehnati gobec z kojega je kak jezik vun štrči stenj i mali kotaček z kojim se stenja more gori doli tirati. Čim se bole naluknul vun bole bi svetil. Se skup je bilo nasađeno na postolje s malim okroglim špiglekom. Dok je lampaš gorel, špiglek je svetlo poduplal.

E, ali to je bil kak bi rekli - fiksni lampaš. Z njim bi se lefko moglo dojti do šekreta ili do soseda, ali za hodanje po klanjcu je ipak bil bolši on pravi - mobilni. Njegov je stekleni cilinder bil za sigurnost omotani z žicom i imel je još i plehnatoga gornjega poklopca i ručku za koju ga se nosilo ili je na nji visel na kolima ili na tremu. Kak bute dale vidli, mislim da je baš o takvomu lampašu reč.

Lampaš je vu vreme dok je ne bilo električnoga štroma bil glavni čovekov pajdaš. Makar mu je plamen bil mali, v trdi kmici je svetil kak v Betlehemu i smrdel po petrolinu dok se je nos ne prifčil. Lampaš je bil i zaguleni, jer če bi v hiži ili kleti opal i potral se, petrolin bi se razlejal i vužgal i vatrogasci bi pak morali kobilu zapreči.

O lampašu je napisano i otpopevano pesmi i pesmi. A ja sam prekopaval po starim stvarima na kajkavskem najži i našel jednu pesmu z 1993. leta. Za krapinski festival toga leta ju je napisal nigdo drugi nego saborski zastupnik Drele. V ono vreme, dok su popularni bili Čavel v glavi i Kolinje, se je Davor Dretar zval Dreletronic i bil je fest narihtani na glazbu. Kaj je denes z našim pevačima da očeju postati političari, a političari pevači, evo, ne znam. Nek to ostane za drugu prigodu.

Pesmicu koju sem našel je Drele sam napisal i otpopeval vuz pomoč Ansambla Šestinčani. Evo, da vas fputim, tekst ide ovak (to sem zvadil po sluhu):

Popevaj mi lampaš

Ovo je priča o starem lampašu,
o pucici lepoj kaj skrila se v kleti,
o kušlecu njenom slatkom kak med,
a kolko je zdaj več proletelo leti
da lice je njeno hladno kak led.

Letni je mesec nekam se vlekel
prek zagorskih bregi, dole vu mrak,
čuk je počuknul, veter popuhnul,
se je tak mirno i spi si selak.

Ti svetlil si meni puta čez kmicu
kad skril se je mesec, kak deca za peć,
ti vodil si mene čez brege v goricu
i nigdar nis’ rekel nikom ni reč.

Popevaj mi lampaš nekaj starinsko
jer denes su cajti drukši nek predi.
Popevaj mi lampaš, a ja bum se plakal,
i steraj mi z srca tugu kaj sedi.

Evo, čist lepa, kratka kajkavska tožna priča z nebeskim srebrnjakom v sporedni ulogi i z lampašom koji je vse steze i pute v živlenju popamtil. A kaj vam očem reči... Dok pesmu prečitate onak v sebi, vam je to tek kajkavska pesma. Da si ju prečitate na glas bi dobila malo žmaha… no, če imate smisla za malo dramaturgije. Da bi vam ju ja prečital, to bi več nekak dobilo i formu (bar tak mislim, kajti mi drugi veliju da mi to kak tak ide od roke).

I tak pesma postaja se lepša i kredneša kak ju zdižemo k vuhu, a veliju da saka napisana pesma koja dobi glazbenoga kaputa postane nekaj sasma drugo, nekak vuzvišeno, nekaj za vse čase. B. Vincetić i D. Devčić, koje ne poznam, su okoli ove pesme napisali glazbu, a of drugi je napravil i aranžman za tamburaše i dodal malo dvoglasa, kak se šika i kak je po pravici. I priznam, pred dvajst i sedem let, dok je Drele još bil popevač, sem gledal točno tu Krapinu ‘93. i ta mi je pesma od onda ostala vu vuhu zanavek. Zato sem vesel kaj sam ju našel na najži, pak sam onda još malo preguglal, i reko, zakaj bi samo meni bilo lepo pri srcu.

Denite si pred sebe, v glavi, sliku svetlečega lampaša, ovoga mobilnoga, kak sam vam ga gori predstavil, pak onda kliknite na ovi črlenu strelicu pod tekstom, pak bute čuli kak bu raspopevani lampaš oživel i vu vašem vuhu.



Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.