Kolumne

subota, 23. prosinca 2017.

Katarina Zadrija | Svečkar


Kak stari krmežljivi ded
Sedim za stolem i smucam.
Pak se nies niš naspala.
Kotrigi me trgaju čem na postelj legnem.
Bol ruje kak da voglen kopa.

Si premišljavam cielu noč
Pa kej je to sad?
Kak da bi mi, bog mi grea oprosti,
Šte drobil kosti.
A zmislim se kak bile je dok sem bila mlada.

Jutre v debele zimske kmice
Kej kak odefka pokrila je se vulice,
I cucke je lajati bile stra,
A dedek je povedal
Da je, da oprostite, dok vun je v noci isel
Na svečkara na dvoru naišel,
I veli da nie ga bile stra.

Svečkara dusa grešna,
Po zraku se same zvrtela
I gasla.
To zate kej vernik sem dober
I navek vuz sebe nosim križ,
Dedek se faljil,
Za križ sem se prijel i same v kmice pritajil.

V kotrige mi onda stra se navlačil,
Kakti megla vuz potok
Kej v sake skrite duplje na vrbe
Nos svoj ftekne.

Bicikljin me vune čekal.
Kmicu i meglu je znjim rezati bile treba,
Če zakesnim v škoulu, mati bou rekla
Da koud sem se vljekla,
Kej ne znam kak ponaša se pristojna dekla?

A kotrigi su drktali kak denes od boli
Tak ounda od pripoverke dedove.
I žganec me v požiraki stiskal,
Goutil, sirotu, da sem se sa vuse povljekla.

Pak dedu sem odgovorila z male kouraza
Kej sem vu sebe skupila:
A kej, kej bi ti videl?
Si se podrignul, pa su se prižgale
Tvoje vinske pare!
Buš vidla ti balavica, dok te svečkar popoudi!
Dedaka ounda nebu da mu presoudi!

Babica je z hamperem mlieka pred vrati zaružila
I z vrat pitala :
Vrak stari, kej gege tvoje v hamperu vode vune delaju?
Čkomi baba, zapri čoube, od ranoga jutra me glođeš!

Mam lježe mi je bile.
Mlijeka sem si popila
Na bicikljin sela i gazila, gazila
Na potok nies ni oka hitila
A bormeš ni natrag se ogledala.
Prva v kmice pred škoulu podvornika čekala,
Na vrata naslonjena senjala
Da pobedila sem na utrke
Tour de France!

Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.