Kolumne

ponedjeljak, 19. lipnja 2017.

Katarina Zadrija | Karta druga (Kerempuh)


Dober dan,

Joooj dragi moji, tuljike vam toga imam za povedati, da ne znam od kud bi pričela!
Of vraži posel me okuperal da nesem stigla mi penkala v roke prijeti.
Korizma je prešla i Veliki teden i Vuzem.

Prljetnoga čišćenja sem zbavila, bormeš i na koljeni, če me baš i bole. A kej čete em nemam prakse klečati, šte mi kriv kej se ne zovem Monika. A zbavila sem ja i to. Sem si vanjkušeca pod koljena dela. Em je ljepše noge v zraku držati neg na  koljeni klečati. Je za cirkulaciju bolje.

I Cvetnicu smo zbavili. Prinam se navek na Cvetnicu vu cerkvu nosil drenjek i sadovene grančice, od sakoga sadja z tnaca po jena, a ounda dok se došle dimam drenka se zatikavale za rog hiže, nek bi hižu od Strele Bože čuval, a sadovene grančice se natrag vu trnaca nosile. Nek bi sadje bile blagoslovljene i cele ljete rodile.

Je, ali došla su nova vremena . Više pravi cvetnički drenek ni vu cerkvu nesmiš nositi. Veli gospon Velečasni da maslina mora biti i za nju je treba dobrovoljnoga priloga dati.

Ali vidiš ti vraga ! Političari su se setili kak se reklamerati, pak su pred cerkvu masline delili. I samoga su velečasnoga preveksljali.

Velim ja onomu jenomu populističaru, ops, oprostite mi, em je mene se sejene političar ili populističar, kak se negda vu cerkvu nosile, a on mi odgovarja da de bi tuljike grančice sadja i drenka prinam našel, a podelil je hiljadu maslin!

Od gda zase znam, maslina da prinam raste, to nesem vidla. Od onda saki dan koud god hojdim okolo po trnaci zafiljavam boum morti koju maslinu vidla. Ili maslin i dalje prinam nie ili sem ja i z očalini čorava. I se bolje poljek toga v križ gledim. Još mi bo nešte i zmišljal da za mladi moži oči obračam, a ja same maslinu iščem.

Vuzem je prešel, Jezušeku smo se na njegve moke za nas zafaljili, vuzmicu prižgali.

A vi morti znate kej je to vuzmica? Če ne znate bom vam ja povedala.

Vuzmica je kak bi po gospodski rekli, jen veliki kres, kej se vužigal v rane jutre na Vuzem dok su se ljudi z cerkve dimam vračali.

A toga kresa je treba bile znati složiti! Neg kak! Za to je trebal pravi majstor, graditelj i statičar! Bormeš je. Naši stari nesu znali kej je to statičar, ali su vuzmicu tak po praf složili da je se zakone statike poštivala i dok je gorela se nigdar nie zrušila.

Vuzmica se delala čez celi Veliki teden. Nie se metale granje kak denes, dok nešte granje od rezanja v trnacu prižge. Delala se od pravi drv. Cele sele je delale jenu Vuzmicu. Denes saki svoje granje prižge pak veli da je imel vuzmicu. Niti se spominjaju, a niti skup vesele. Same su si jalni, i spod oka se glede.

Je jala i negda bile, ne velim niš, ali su se skup družili. Denes same vu televizore i mobitele zure.
No, da se ja vrnem na vuzmicu.

Najprije su se si skup dogovorili koji bode kej za vuzmicu dal. Onda su išli v šumu po drva. Jen gazda je dal doge jake drva z šume kej su bili boumo rekli nosači. Četri velike jake stope med koje su se slagale drva . Placa je med njimi bile, tak, do metra. Metale se i tenjše i debele drva i suve i mokre, kak bi to se skup dobre gorele, a da se ne prehiti. Najte me preveč pitati kak je to redem išle, em mi se čini da nema prinam ni jednoga vuizmic majstora, pak nemam koga pitati. Deli su i male suvoga granja da bi bolje gorele. Morale se dobre nosive stope zabiti da se ne poruši. Treba je bile znati kak se dromne i debele i suve i mokre drva slažu, da se vuzmica dok gori ne prehiti i da nedaj bogek koga ne vmori. Do velikoga petka je mourala biti gotova. Na Veliki se petek nesmi z čavli i z drevem delati.

Sake sele je imele svoju vuzmicu, kak sem već rekla. Takmičili su se čija boude ljepša i vekša, čija se boude na dalje vidla.

Saku su noć po dva-tri mouži čuvali vuzmicu. Da ju ne bi huncuti z drugoga sela prije reda prižgali, a zanje dve noči bormeš se morale dobre paziti. Zgorela bi taj čas.

Se mi se čini da sem negde imela za čujti da prave Vuzmice još delaju gore spodi Kalnika okoli Orehovca, pa če koga interesera ...

No, je kak sem već rekla Vuzem je prešel. Bili su i izbori, ali boude drugoga kruga, kak vu konjski trka. Same su of pot pevci mirneši, ili su trudni od takmičenja ili su dobili doma, a motri i de sastrane kej njim treba.

Je li vi dragi ljudi mene verujete da ja ovoga Kerempuha pišem na rate, poradi posla. Vrak ti skeljil posel. Veli se da posla bou, a nas nebo, kej mi to vredi kad me bou i onak ves pričekal.

Saki dan pred kompjuterem sedim,  zakone čitam, gruntam, z porezniki se borim. Več mi je to se pomalu dosadile.

Se zmislite morti onoga vrageka z rogi i anđeljeka kej čoveku vu vuhe šepče?

Tak je mene of prvi v zanje vreme vu vuhe šeptal : „Čuj, adrenalina ti fali, ti je dragi bogek osečaja za pravicu dal. Zake ti to nebi skoristila? Prihvati izazov! F politiku se hiti, probaj nepravdu ispraviti.“

Saki je dan on mene na taj gre teral kak vrag svoju mater, tako douge dok se anđeljek nie zbudil, pak velji : „ Kam te vrak nosi, em f politike same oni kej zase glede prospereraju, a takvi kak ti, naivci, moreju same kak Dudeki sem zrende biti!

Fala Bogeku kej sem k pamete došla.

A za adrenalina su se postarali voluharice v trnacu, srne v grahu, zlatice v kromperu, lukova moha, slak, pirika, ambrozija i suša. Suhe je da nemreš koljec v zemlju zabiti.
Tak, sad znate s čem se ja ove dane gombam.

Gruntam si, bi vam povedati zake ja ove karte kej vam pišem zovem Kerempuh ili ne...
Senjek vam još nebum povedala, se probajte sami domisljiti.

Do druge karte Bog vas blagoslovi!

Vaša Kerempuhoškrabačica

Nema komentara :

Objavi komentar