Željko Bilankov | Spli'ski festivali

(tridesetdeveta kratka priča pisana pretežno šoltanskim dijalektom)

Ma, deboto nima nikoga iz ove naše lipe Sridnje Dalmacije, ko more kazat da mu Spli'ski festival ni obiliži mladost, a borami i veli dil života. Tako san se i ja, te ijadudevestošezdeset i druge, prvi put susre sa tin, meni malemu, velikin svitliman pozornice, šušuron muzike i veselog svita. Ka i uvik kad smo nigdi išli, mater bi me narešila, ali za ovu priliku još i boje, pa san pari puno stariji od sedan godin, koliko san zapravo ima. A ča ćemo govorit za njih dvoje, nego da su izgledali ka iz figurina. Mama, u to vrime već cinjena šnajderica sašila je ocu i sebi robu, s kojon nimalo nisu zaostajali za pivačima, oliti brojnin uzvanicima prvega pravega Spli'skog festivala. Sićan se Jadranova bazena, koji san tad prvi put ugleda i skoro upa u njega naginjući se da mu vidin dno.

Pozornica je bila smištena odma do ulaza, isprid nje nikoliko redi katridi i onda tek iza bazena, na drugomen kraju, ostatak gledališta za brojni svit, koji je želi čut najlipje melodije s okuson mora i soli. Nažalost, naše je misto bilo baš tote, okle nismo mogli dobro vidit pivače, ča nas je svih najvišje zanimalo, ali smo dobro čuli. Štaviše, uviren san da su predivni zvuci glazbe, te posebne litnje noći kraja osmega miseca, stizali čak i do moje Šolte. Najviše mi se usikla u sićanje, poslin od publike prvonagrađena pisma „Ćakule o siromajima“, koju je na svoj smišan način izve, onda najpopularniji pivač u Jugi,  Đorđe Marjanović. Puno plješčanja, ushićenja i razdraganog žamora, pratilo je svaki nastup, a moji su bili naročito oduševljeni Anicom Zubović, odnosno Markom Novoselom i njiovin, dandanas poznatin „Maškaran“ i „Serenadon“. Kad je sve bilo gotovo, ka sad vidin napuštenu pozornicu Festivala, sa di kojin mikrofonon, žican i katridan, a isprid nje vajala se po podu nika kartušina nošena kasnin večernjin vitron. Još san se jednon okrenu i sinja pivačicu Marušku Šinković, kojoj su se moji javili, jerbo smo je poznavali iz Splita i zajedno š njon znali ić i u kino! Inšoma, šušur je biva sve tiši, a kolone judi razmilili su se gradon i mi sritni meju njiman. Mater je naravski većinon pripričavala modne detalje, a otac pisme koje su in se svidile. Eeh, da, kad se jednon zajubiš u take prilipe note, onda je to deboto za cili život. Kako je mama znala dobit karte za Festival, a ocu su Rogač i Šolta, vikendon bili prioritet, ja san je prati sa gušton. Brž san iša u drugi razred sridnje skule, kad smo pošli, uređeni tip-top, na finalnu večer, ovi put na Prokurative. Imali smo misto u prvemu redu, pa mi se parilo da san na pozornici skupa sa pivačima. Koji je to bi lipi osićaj, kad se naprosto živilo za te dane. Inšoma, u prvoj pauzi priđe nan jedna fina dama, očito materina mušterija, jerbo su se tako srdačno pozdravile, pače izjubile. Ta žena, sazna san potla, poznata spli'ska kozmetičarka, mađarica porijeklom, vidin gleda mene, pa mamu, pa opet mene i očito čeka da me mater predstavi. Ali kad je konačno dočekala i mama joj rekla: „Ovo je moj sin!“,  inkantala se u trenu, da bi, kad se pribrala, s osmihom rekla: „Vaš sin, siiinnn, a ja mislila, jubavnik, hahahhaa!“  Ne triba se čudit temu kad su u pitanju judi tega miljea, pogotovo ča je u to vrime mater imala tristišest godin, a izgledala mlađa barenko deset. Naravski da san i ja, obućen po njenin sugestijan, višje sliči nikon dvadesetogodišnjaku, pa se gospoji ta kombinacija parila logična!

Maa, bi je to i festival s prikrasnin pisman, pripunin gledališten, krasne scenografije i pravega splitskog ambijenta, na Prokurativi i okolnin ulican. Pamtin da smo glasali za Mišu i onu, danas legendarnu, „Proplakat će zora“. Ipak, neposredno prin, sre san jednog ča je radi s mojin ocem i reka mu da ću dat glas Miši Kovaču, na šta je on izgovori ka iz topa: „Ajme, temu Bosancu!“ hahaahaahaa. Toliko o njegovin simpatijama i znanju da je tada izuzetno popularni pivač, bi zapravo Šibenčanin. Svašta se izdogađalo te večeri, pa je tako, po završetku Festivala, mater silno ogladnila i naprosto zaželila ćevapčići. Najboji su bez dileme bili nasuprot, kako mi u Splitu znamo reć, Stare Slobodne, a tamo gužva, ka da čekaju za uć na Plac gledat „'ajduka“. Kasna je ura, mama sva na iglan, ja se tiskan, ali drugi su jači, prin bi reka bezobrazniji. Mejuto, kad san doša na red, ćevapi višje ni bilo!

Ajmeee razočaranja, ala me je oprala, da kako nisan uspi, da ča se nisan tiska, da će umrit o gladi. Deboto je nikad nisan vidi taku. Inšoma, brzo ju je prošlo, jerbo je dobro znala, da nisan kriv. Ni autobusi nisu vozili, pa nas je tokalo poć na noge. Do kuće smo išli najmanje po ure, zato smo doma, iscrpjeni i gladni, odma navalili na frižider i usput se hlihliščali ka poludili. Inšoma, danas višje nima one atmosfere nekadašnjeg Spli'skog festivala, onih dan kad su to bili najvažnija litnja događanja, kad se pivalo i družilo, feštalo i disalo sa gradon, kupovalo ploče i kasete. Nika nova vrimena ipak su odvojili jude i donili nove običaje, ali zato imamo sićanja, koje nan niko i nikad neće ukrest!