subota, 18. srpnja 2020.

Željko Bilankov | Moj dan


(tridesetosma kratka priča pisana pretežno šoltanskim dijalektom)

„Ajde Žele reci, koliko koga voliš?!“, znala bi me dikad uz provokativni osmih, upitat materina starija sestra, moja draga teta Ćirila... i onda bi ja ka iz topa ispali: „Baku do Brda, didu do lanterne na Badu, a tebe teto, sve do Splitaaa! 

To su, meni malemu, bile jedine udajenosti koje san poznava i š njima se mirila količina jubavi prima mojin najdražiman. Već niko vrime mater je boravila u Splitu, tamo di je otac živi ka podstanar, da mu bar skuva, oli da prošetaju digod rivon i barenko nakratko paridu ka pravi muž i žena. Naravski da nisan moga razumit mamin odlazak, pa se sva moja jubav, iz iskonskog dičjeg dišpeta, privalila na njenu famiju, koja me odgajala, čuvala i beskrajno volila. Mejuto, kad se mater jednega dana napokon vratila, skoči san joj u naručaj i reka da je volin daje od svih lanterni na svitu!!! Hehheehee Vrime je teklo, a onda je i mali Žele, dočeka svoj trenutak.

Te davne, ijadudeve'stosezdesete, mater i ja spremili smo se za Split, jerbo je otac dobi sustanarstvo u Kninskoj ulici, kod starega Splićanina Šegvića. Oproštaj sa mojiman u Grohotan, bakon i teton, bi je pripun suz, nježnosti, zagrljaja i neskrivene jubavi prima meni, njiovon prvemu unuku. Moj dida Tonko odluči je pače, da nas otprati do Rogača, pa me posi na tovarčića ka pravega cara. Krenuli smo polako, mama i on nosili su valižu, a ja san se važno drža za samar. Na izlasku iz dvora, još jednon san se okrenu i mahnu baki i teti, inkantanin i uplakanin, dok su me pozdravjale sa balature drage mi kuće, u kojoj san prove prvih pet godin mojega života. Na putu kroz selo, intrali smo puno judi i svi su nas pomalo tužni, teplo pozdravjali uz ono poznato, „Vratite nan se ča prin!“. Spušćali smo se polako, strmin docen do Rogača, pa je dido mora dobro pazit da se ne iskrenen s tovarčića, mojeg smišnega Miška. Za mulom je već bi armižan stari legendarni i puno lipi brod Bakar, kojin smo tribali za Split. Još nikih sto metri i moramo se rastat, a moj dida Tonko, dido, kako san ga od milja zva, veli jaki čovik, ali mekega srca, ipak ni moga zaustavit suze, pa smo se onda svi usplakali. Na skali naš zadnji okretaj, mahanje i obećanje da nas eto, brzo nase. Inšoma, iako me mater dovodila u selo kadgod je mogla, a to ni bilo malo puti, ima ništo ča me vezivalo š njima na Šolti, cili vrime. Bi je to moj rojendan, koji se u Splitu, sedmega marča slavi ka mali pir. Mojiman na Šolti ni bilo nimalo jednostavno doć u Split, pogotovo kad je grubo more, ali su zato po nikin judiman, znali poslat čagod za nas, odnosno mene, njiova unuka slavjenika. A ono ča je najvažnije, uvik san od njih dobiva posebnu čestitku. Pamtin priču kako bi se baka i teta, jerbo je dido već bi pokojni, mejusobno podsićali da je njiovu unuku i nećaku brzo rojendan, a onda bi teta Ćire, rano ujutro pohrlila na Poštu da mi pošaje prigodni telegram. Jednon su zakasnili brž samo dan, pa su se žive izile, naizminično se optuživajuć. Toga se dobro sićan, jerbo san baš tad, nedugo nakon spli'ske proslave rojendana doša u selo, pa su mi se bidne opravdavale, a teta napadala baku, kako je ni sitila i kako će joj iščupat sve vlase! Haahahahha. Mora san ih smirivat, da bi sve na kraju završilo dobro, sa zajedniškin zagrljajen i spontanin smihon. Maaa, uvik san rado čita i druge pristigle čestitke, samo ta, njiova, dragih i neprižaljenih osob, uz čiju san jubav prove bezbrižno ditinjstvo, bila je uvik ništo posebno. One ne bi došle, ali bi došla njiova tepla pisana rič i sva jubav sročena u ono: „Sritan ti rođendan, dragi Žele!“.

Ne, nikad ih neću zaboravit, a ti dan, izgleda bi se još lipji uz te dvi, meni posebno srcu prirasle osobe. Prošlo je već pedeset i dvi godine od smrti dide, dvadesetosan od odlaska bake i dvadeset i dvi od kad je moja teta Ćire sklopila svoje lipe oči, ma oni u meni i daje žive!


Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.