ponedjeljak, 27. travnja 2020.

Željko Bilankov | Ja i 'armonika

(trideseta kratka priča pisana pretežno šoltanskim dijalektom)

Brž san ima devet godin, kad je otac, na istinsko čuđenje matere i mene doni doma jedan veli paket, prin bi reka upakirani sanduk i stavi ga posrid kujne. Iako smo ga nestrpjivo ispitivali, samo se podsmihiva i ni nan ti ništa reć, nego je poče odmotavat špag, a poza tega i kidat debelu kartu koja je služila ka omot. Za to smo vrime mater i ja, stajali ka inkantani, a jopet radoznali, ča ćemo ugledat, kad sve bude gotovo. Otac je samo muča, ali ni moga sakrit smišak. Inšoma, meju brdon kartušine i konopa izroni je deboto drveni kufer. Pažljivo ga je otvori, pa izvuka iz njega jednu finu kutiju. Malo potla postalo mi je jasno, zašto je tribalo bit tako dobro spakirano... unutra, na crljenoj čoji, ugodno se smistila prava pravcata, prilipa 'armonika, sa tipkan i botuniman. 

Niko od nas ni moga sakrit iznenađenje, prin bi reka oduševjenje, pa čak ni tata, koji je zna ča je u paketu. Prolazili smo rukan priko nje, gladili je i gotovo tepali ka malemu ditetu. Dug je bi put ovega instrumenta sve do Splita i „Naprijedove“ butige na dnu Pjace, u kojoj je otac radi puste godine. Mnoga pisma, borše oliti paketi za Šoltu, znalo se, ostavjali su se kod Marina u knjižari, pa bi niki došli po njih, oli bi ih, nakon obavjene provište ili odlaska likaru, vazeli prin odlaska na škoj. Zato je i ovi drveni sanduk doni ocu, baš u butigu, jedan naš Grohoćanin, koji je ravno iz Chicaga doša u posjet svome rodnemu kraju. Naime, 'armoniku je poni na molbu očevog barbe Mikule, koji je nonde živi od rane mladosti kad je poput puno našega svita, trbuhon za kruvon poša u daleki svit i to parobrodon za Jameriku. 

Zapravo, 'armoniku je svira očev prvi rođak, barbin sin Clarence, čije ime je bilo ugravirano na njoj, ma se brzo štufa na razočaranje svojih roditeja. Zato je didov brat odluči darovat i usrićit svog nećaka, a ni zna da moga oca nimalo ni zanimalo sviranje. Maa, ti naši judi u dalekon svitu mislili su kad bi poslali jedan dolar u pismu, da je to ništo veliko, jerbo su na nas gledali ka na sirotinju, a kamoli poklonit ovako ništo! Barba se opošteni, pa je ovi vridni instrument tribalobarenko provat svirat. Kako tata ni ima voje, a bi je bokunić i star za učenje, koga će dopast nego mene bidnoga. Naravski, kad i sad pamtin koliko je bi težak i veli za jedno malo veće dite. Inšoma, sve je tribalo bit po pravilima, pa su mi za učiteja našli prijateja famije, meni dragega, uvik veselog i vrsnog grohoćanskog glazbara, Škoku. Pored škole, mora san učit i note, a na početku svakega sata, kad bi meštar doša i namistit 'armoniku na sebi, kako triba. Eeh, to je tek bila prava muka. Znan da san potla, nakon vižbi i odlaska barbe Škoke, jema grube friže na rameniman, od kajiši i njezine težine. Ipak, na vele jade, pomalo san uči, za mene, teški zanat, a nisan se gotovo ni smi požalit. Mater je suosićala ka i uvik, a otac me je već vidi ka svirača, oliti zabavjača u društvu, jerbo je 'armonika u to vrime slovila ka glavni instrument za veseje bilo kojega tipa. 

Bi je barba Škoke uviđavan, u početku i puno strpljiv, pa san uskoro solidno odsvira lipu, dičju pismu Ivice Stamaća, „Maestral“, gledajući u note, koje mi je on ispisa. Naravski, stihove i danas znan pivat, jerbo zvuče prekrasno: „Na pučini plavog mora, njihao se val, kao neki tromi medo što ide na bal. Putujući nešto mumlja, udara o žal, to se s njime igra, šali, vjetar maestral...!“ Maa, bilo je u meštrovoj knjigi „Škola za harmoniku“, iz koje me uči, još puno lipih pismi, ka na primjer, „Dalmatinke male“, koja je bila slideća na redu. Ne znan je li moje uporno vižbanje, ispravjanje, sviranje, odnosno ponavjanje jednih te istih glazbenih tem, pomalo smetalo mojima, ali znan da je meni svaki dan sve više bilo muka od ovakvega prisilnog rada. Nada san se da ću zavolit ovi instrument, kako bi moji bili sritni. Mejuto, kako od malih nog nisan voli da me se na bilo ča prisiljava, iako bi posluša radi obzira i pristojnosti, dogodilo se baš suprotno. Ča zbog težine same 'armonike, odnosno radi nedostatka koncentracije, jer svirat, po duši nisan voli, ča zbog obavez u osnovnoj skuli na koju san se zna izvlačit, moja dičačka glazbena epizoda, išla je svome kraju. 

Danas mislin da je svoje, sve češće nedolaske, barba Škoke opravdava svin i svačin, a razlog je bi samo jedan, ča je vidi da će se satrat, a neće uspit. Puno godin poslin kad bi se viđali, uvik bi me pozdravi sa osmihom i pita o svemu, ali 'armoniku nikad nismo spomenuli. On je shvati ono ča moji, boje reć, moj otac nika ni moga s'vatit. Silom se ništa ne može postić, jedno su ambicije, drugo realnost. Moja enigmatika pravi je primjer upravo toga. Niko me nikad ni tira na to, pronaša san je sam, u svojoj četrnajstoj godini i zavoli svin svojin srcen. Bi san poslušan, vridan i uporan, da bi bez ičije pomoći dosega sami vrj našega zagonetaštva. Ponekad se pitan, kod koga je završila ta lipa 'armonika barbe Nika, kako su ga Jamerikanci zvali. Moj brat, gotovo je siguran da se na njoj učila svirat osoba, koja je istinski volila ovaj, danas pomalo nepravedno zapostavljeni instrument. Možda je pronađemo i vratimo kao vridnu obiteljsku uspomenu, jednog drugog, i usprkos svemu, lipog vrimena!

Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.