Kolumne

srijeda, 29. ožujka 2023.

Slava Rosandić | Tračljive babe


Na plot so se nalaktile

Z škornjami v blato zaglibile

Ter se tračof prifatile.


Kaj se je zgodile, sosedica draga?


Sega ima, mila Bara; al čkomete, ne zucnete o tem niti možu

Ter mi bodo, ak se sezna, – ogulili z riti kožu.


Naj'te se brigat, slatka kumo, 

Z jezikom zbegecale mi to bumo.


Jeste čuli kak se Cindoriji svadiju i biju?

Je, em, kak i ne bi ter bogoveten den ločeju i piju.


A, Futačova Marica je nekak mi debela,

Kaj velite, bo fačuka imela?


A, ste vidli, kak se Gabrek hapil posla?

Norec, mulec, zamudljivec i smutljivec – bedastejši je od osla!


Je fiškalek rešil ono?


Je, je – rešil to je 

Al penezih zel je pono.


A, zakaj vaša nokica škole ni zaveršila?


Kaj se pačaš, kaj se brigaš - kem z tvojem je nokom skroz-naskroz zaglibila.


Naj't me vređat, vi tračlivka,

Kem ste v letah; niste več drislivka!


Ite z milim Bogom v svoju bajticu…

Našla bom si frišku pajdašicu.

Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.