|
Jelena Hrvoj |
Eleonora Ernoić Krnjak |
Martina Sviben |
Mirjana Mrkela |
Aleksandar Horvat |
da se same jemput na lete
zmisliš onih
koji su mislili na te saki dan
no – unda si i ti guste mislil na nje
osobite kad je bile na vrtu i v klieti
il još bolje na najža – za zeti
ve ud velikuga posla i strašnuga ritma života
ne stigneš ni sveču vužgati
normalne, dalke je i pout te košta,
a na selu je i blate a i nekak kak da smrdi
a kak da je lahke bile matere i ocu
za sineka v gradu
gujceke hraniti – saki dan v pusranumu kocu
duha dežđa, žmehki zrak
veter pafta se bolj z grana
sounce se skrile, črni se mrak
kmica – a sred bieluga dana
prazne je nebe, nigde ni tiča
udsikud tišina odzvanja
ud nikud ni ni diečjega kriča
se v nekakev mir vranja
al na polju borba traje
prie dežđa krmu puspraviti treba
za Šargu, tera mlieke nam daje
same hitre, dežđ već vreba
ej si igda pusluhnul Zlatarščicu i Reku
kak z svoji tiela šum šumiju,
al ne nosiju z sobu v daljinu podmuklu tišinu
nek same liepe rieči o svojumu Zlataru
o Zlataru nunanumu med dva brega
(do god da ih je delal –liepe ih je napravil)
o ljudi teri zemlju namačeju znojem
i o kaju teruga imaju najrejše ud sega
krenule je stiha z par vreč smese
da bi i skuter postal premale
napravili su ti koce,švasali lese
dobre ide – sam da ne stale
z početka si pokle takve tekme sake
duge,duge pod tušem stal
da bi se posrane kvake
z mrzlu vodu z sebe spral
al ve ide se bolje i bolje
savest več ne peče ni male
pre tekme na brzaka pregledaš note
ofsajd i faul odigraš ko od šale
al fejst me zanima
ej buš na spovedi župniku rekel
za saki zmišljeni penal
il se buš same mutav delal
i govoril kak nisi znal
da je greh i jen bod hkrasti
teri malumu klubu pune znači
da je greh živeti bez časti
kad z tebe gnjilež zrači
al dobre igraš
ne falšaš ni ton
pak buš delegiran
jer bu tak rekel On
zakeljen za krevet do kraja života
ni na šekret nemreš sam
počinje za te prava strahota
pozabi na ponos, pozabi na sram
onuga napuhanuga muža več ni
koj se šepuri kak puran
nič te v životu ne veseli
prosiš Boga da zgotovi dan
i ve dok čakaš da ti juhu donese
vura nejde,kak da stoji
a kak da je vreme letele
dok te v autu čakala
a ti šank potpiral z prijatelji
viš da saka rit dojde na šekret
kak mladenkin šlajer
se vleče megla
pomalu
da se ne podraplje na gacije i kupinju
kaj tiraju na zapuščeni njiva
gli tam de je ne tak davne kuruza rasla
a cug nič ne pita
nek bez ikakvuga upozorenja
meglu trga (pri premale brzine)
dok šljakere vleče
polegle na rasklimane zice
šljakere zmučene od nočne šihte
prestrla je jesen
debeli perzijaner
pod noge vetru
da se ne zdraplje
„nek mu bu mehke !“
kad med drevljem
kak nori popelja
nekak na brzinu
efikasne i krasne
zalepila si
se komadiče mene
teri su rastepeni
po svemiru se kometali
(saki ficljek se v svojumu
nemiru kopital)
i složili su se
v čvrstu cielinu
tera baš paše
i nek bu tak
da se zna
štel bi ti povedati
v par rieči
onak, z rieč - dvie
one koj se nemre, znam, nikak povedati
same z rieč - dvie
zmišljam,
terem si tikvu
z nečem koj neznam
koj ni moči čujti ni na televizije
ni na radiju
niti v novina pročitati
(čini mi se da ni sveznajući google
ih nezna)
znam da su nutre v mene
i da buju zletele
kad bu došel čas
a do onda same bum rekel:
se znaš
z pelena si krenul
v pelena buš stal
v kolica su te peljali
pak buš na nje spal
kotač se vrti
putem sakoga hlovi
veliki misliju da njih nigdar ne
al bar potem si isti sme je
kotač se obrača
kak električni bik se riče
kad-tad se nas zdrucgane, z fljuntami i v krvi
z sebe spohiče
z pelena si krenul
v pelena buš stal
v kolica su te peljali
pak buš na nje spal
