Eda Budić | Potreba

Svietu rabiju oni ki držiju besedo

kijsti će te poslušat

i znat ča je najbolje storit.

Svietu rabiju škrbni i pošteni

ki nećeju drugemu zla,

pametni, ki se ne držiju

keh ni čut zajno i svagdere.

Svietu rabiju

ki su kapaci prontat najbolje

za ponudit i kumpanjat,

tihi i prez čuda vicije,

ki su kapaci potrpet.

Onijsti kejsten se sviet smeji

potapara hi,

drži za jeno malo brižni.

Svietu rabiju najveć onijsti

kejsten sviet ne rabi.

Ki nisu od svieta.

____________________________

rabiju-trebaju

storit-učiniti

kumpanjat-otpratiti

vicija-hir

potapara-omalovažava