Kolumne

petak, 25. veljače 2022.

Aleksandar Horvat | Vredni šumski duh


Ja sem vredni šumski duh, bez senke,

V šumi teče šumsko mi živlènje.

V lasi pletem bršljane si tenke,

V krošnje vračam vetra i šumènje,

Ftiča poj, čkomini iskuplènje.


V tenku koru grabra korenjaka

Lesoviku ja rišem znamènje.

Gnezda pletem, farbam dežđevnjaka,

Po potoku skačem čez kamenje,

Šumi dajem tiho žuborènje.


Ja sem vredni šumski duh zelèni,

Slavim sako šumsko prestvorènje.

Vu meni se rujaju jelèni,

Gljive skrivam v listje med korenje,

Luknju kopam, lescu udomljènje.


Mahovinje tepih mi prestira,

Drevje vživa sonca zažarènje,

Ververica žire mi nabira,

V krošnji, zlati se kostanja zrenje,

Gda oblačim oprave jesènje.


Ja sem vredni šumski duh vsemočni,

I nad šumom zapovedam bdenje,

Ja sem hrast i matapurač nočni,

Šuma, to su moje žive senje,

Šuma - zemle v nebo nastavlènje. ___________________________________________

Lesovik - (Lešij, Lesovoj, Lešak) - staroslavenski duh šuma i zvijeri

Nema komentara :

Objavi komentar

Hvala na vašem komentaru. Isti će biti objavljen nakon pregleda moderatora.