bila san u oca
masline brat.
Koliko ih ima
ni on sam ne zna,
priko dvista baren jedna.
Njemu 84. godina gre,
ma ne fermaje,
po cili dan po poju kuri
čisti, sadi, bere.
Svako stablo
deset putih obađe,
ne daj Bože da se koja trava nađe.
Svaku je obriza
očisti i zagnjoji,
isto ko kad je mladić bi.
I tako dok san brala,
na ovu san intrala.
Jel dobro vidin,
jel me vid vara?
Zazoven ga Ta...
jes ti ovo novu ode peta?
Bome jesan, tu san usadi,
ovo godišće kad mi se
praunuk rodi.
Ja je neču siguro brat,
ma vi čete mu je ukazat.
Neka zna ko mu je pradide bi,
koliko je pojih radi.
Ja san usadi,
a vi dico ne zaboravte
ča san vas nauči.
I svoju ste dicu naučili,
da znaju i volidu ono
otkud ste vi pročedili.
I voli bi čerce
kad ode pasaš,
da fermaš...
sa unukon oko nje pasaš,
neka od gori znan
da mi trud ni bi zaludan.
Hoču Ta, hoču jedva san izustila,
glavu okrenila,
da mi suzu u oku ne vidi,
a vidila san njegovu
kako se niz obraz cidi...
E moj Ta, dragi i vridni...
Fotografija: Privatna arhiva autorice
Nema komentara :
Objavi komentar
Hvala na vašem komentaru. Isti će biti objavljen nakon pregleda moderatora.