Đurđa Vukelić Rožić | Dramolet: Lektira

Likovi: Julkica i Mirek, supružnici

U tijeku je bračna svađa, Julkica i Mirek nikako na zelenu granu u svom sve ozbiljnijem i burnijem razgovoru. Nakon mnogo godina šutnje, zbog mira u kući i sretnog djetinjstva njihove djece, s puno gorčine Julkica je progovorila svoju istinu koju je dugo vremena šutke skupljala u sebi. Trebali su zatvoriti prozore na hiži…

M:  Julkica, daj mi reči, a zakaj se mi ne spominamo?

J:  Si pozabil? 

M: Čuj, očemo se spominati, biti svoji? Kaj je bilo, bilo je …

J: Se nemreš setiti kaj si kriv?

M: Nikak. Probal sem vse, koncentreral se, dumal, študiral, spil sem dve kupice vinca; nikak se setiti ščim sam te tak jako fkanil. Da me vmoriš, neznam kaj sem kriv.

J: Znaš kaj, kupila sem teku kak sme negda imeli za lektiru. Pogleč kak je lepa i debela. Tu zapišeš vsaku spelanu laž, ti pomore setiti se.

M: Kak to misliš?

J: Točno tak kak sem rekla. Svaki put gda nekaj z mastiš i zhiniš, to lepo zapišeš. 

M: Si ti baba svoja? Ti trebaš pomoč z tu svoju pamet! V Popovaču¹ peš ...

J: Očeš reči da sem ponorela? Ti me farbaš, lažeš v oči, a ja pem v betežnicu? Ti si navudren a ja se pem spominati z psihijatrom? Se to tak dela? Sem to doživela?

M: Prosim lepo nis ti ja prilepil dijagnozu. Ti si sama lepo rekla da si – ponerela. Si zapiši ak nemreš zapametiti.

J: Naj mi reči! 

M: A kojega vraga bum hinil več kaj treba, ak to onda moram zapisuvati v tu teku?

J: Priznaš, znači! Lažeš kak zineš. Lažeš kak si dugački i široki!

M: Julkica…

J: Deca su prešla z doma, oču rastavu. Grunt se proda, podelime se i zbogom. Ili rastava ili buš v teku pisal vsaku laž. Smutlivec jen stari prefrigani. Tvega manupileranja mi je dosti. 

M: A kam pem ak me steraš z doma? Domovinu svoju nemam, brača i sestre su vse rasprodali. 

J: Je, a svoj del penez si z Veru zatrajbal. Rastava! 

M: Ti nesi svoja, kam je zginula moja dobra i draga Julkica? 

J: Si mislel da sem bedasta, da bum zanavek čkomela i trpela tvoja zlodela. V teku buš zapisuval kaj spelavaš i to dan po dan, i pijaču komu i koliko plačaš. A ondak bumo videli kak dale. Saku subotu buš tu sedel zmenum, spili si bumo kavicu, spečem punu zdelu kraflinov a ti otpreš teku i buš mi čital lektiru naglas. 

M: Tak se nesmo dogovorili.

J: Imaš prav. Niš se nismo dogovarali. Same sme se kušuvali i stiskali gde i kak sme stigli. Lukavi lovec si bil, grooming² ti je bil za pedeset i pet!

M: Kakvi gruuu .., o čemu ti laprdaš? Se delaš spametna, kaj? Matičar ni niš rekel o laganju i tem vražjeem gru..., kaj got to bile. A ni župnik. 

J: Sad ti ja velim kaj trebaš znati. 

M: Julkica, a zakaj ti misliš da ja tebe lažem?

J: Zato kaj sem te v laži vjela vsaki dan.

M:   A kaj sem lagal? Nu, nu, reči mi.

II. DIO

J: Sečaš se gda se naša Marica rodila?

M: Sečam.

J: Kuliko penezi je kum Gospodnetić del pod nejni vanjkušek?

M: Ja, ovej…. Čuj ti, baba jena, am je Marica več udata, ima svoju decu. 

J: Ne sečaš se kaj si mene rekel, ili se ne sečaš kuliko marki je kum dal detetu pod glavu?

M: Kojega vraga spelavaš, kaj to sad zvlačiš z hištorije?

J: Nadale z našum jednačbum. Od tega kaj je Marica dobila, a to je bilo pol kaj su kumi prišparali za nu, ti si pol vkral. Marice ni skoro niš ostalo.

M: Začkomi več jenput.

J: Zapameti si, ak moreš, gda te pamet ne služi, ne smeš lagati. Tak dumaju veliki filozofi.

M: Julkica, am je to bilo pred trideset let. Ti tvoji filozofi lažeju.

J: Ili buš pisal svoje laži vu teku, ili niš od orehnače i filane paprike. Ak bu teka tri dana prazna, pem k gospe advokatice. 

M: Baba, znaš kaj, ja si kupim bureka, čevape i mesnoga doručka, neš ti mene ucenivala. Tvoje kuvanje, ionak niš ne vala. Preselim se v letnu kuvinju, to je ionak klet mojega deda dovežena z goric. 

J: Laž, da moje kuvanje niš ne vala buš prvu zapisal v teku. Zutra se neš sečal kaj si rekel, a od te tvoje zdrave rane ti se rit zaštopa. A Vera?

M: Kaj žnu?

J: Morti ona bolše kuva? Misliš da nis znala? Ili nis videla kak si joj odojka odnesel prek kuruze, prede nek si je vozil na pijac? Petnajst sme ih preselili na traktorsku prikolicu, a gda si išel zdoma, bilo ih je četrnajst. Jenoga je jastreb odnesel, ili kaj?

M: Ti nesi pri sebe. Zakaj bi Vere nosil odojka?

J: Trebal si ga zdresirati naj ne cvili čez kuruzišče. Te je sused Barić slikal z mobitelom. Točno se vidi kak bežiš z gujdom k te mužače i selske flundre. 

M: Julkica, ti si moja lepotica, ni jena baba v cele županije ni tak dobra gazdarica ko ti. A kaj sad spelavaš? Zakaj Verušku vređaš? 

J: Očeš reči da je nesi odnesel odojka vu vreče? 

M: Julkica, kaj ti je došlo?

J: Lepo pitam, reči mi po istine. Ili buš lagal? To z Verom ni uspelo, kaj? Spametna je ona. Vraga bi dvorila deda i veša mu prala. I negvu decu dočekivala gda bi ga došli videti. Se ne sečaš kak si prek plota skakal k te flojze? 

M: To ni po istine, ni mislit! Nis i basta! Otkud ti to da sem pobral Maričine peneze? Ak sem je zel, hipotecki jeli?

J: Tu si hipotecku hipotezu gurni za škrlaka! Kumek Gospodnetić je lagal kume Anice da je Marice pod glavu del duplo više novci nek je.

M: A kak ti to znaš? Kak ona zna. To ste vi dve nama mužima skuvale kašu.

J: Stari trik, ded se napije gda gre doma od svoje šoce. Za kaznu od žene dobi z tavicu po čelenke. Pijanoga ga stera na senik spati. Tak gelipteer dobro prejde. 

M: Naj mi reči. Školuvanju nigda kraja. 

J: Gda ga je kuma našla smacanoga v grabe, dočarila ga je domom, preslekla i pol teh penezi je našla je v žepu kaputiča, v kuverte z čestitku: „Moje zanavek lepe i mlade, jedine, lublene Veruške, srečen rojsni dan!“ 

M: Ja to ne verujem. To si zmislela.

J: Malo zutra. Slava Spuriševa mi je pripovedala, pratila je situvaciju pri slavlenice ze svoje najže. Pri Vere, na rojsnomu danu je prvi bil stari Rundek, mam zvečera, dok je Rundekovka krave dojila. A kum Gospodnetić je čučal pod oblukom. Potle se je napil tak da ni mogel stat na nogmi, rekla mi je šankerica Višna. 

M: To ni moguče, to ni po istine! To ti nebu prešlo. Kaj bi kum držal sveču...

J: Am si zaradi lublene Veruškice nosil roge velike kaj azijski vodeni bivol³. I ti i kum. Gda ste išli skup po putu, trebalo ga je v pistu preširiti da imate dosti mesta za krila od rogov. 

M: Jula! Začkomi več jenput. 

J: A z trejtim pajdašom ... bormeš ste pravi „Lulek-Boys“³ band. 

M: Začkomi!

J: Vuz raspored ko gda pegla...

M: To ti ne oprostim. 

J: Kaj mi ne oprostiš?

M: Da se nesi usudila me tak ...

J: Kak vas dedi ni sram i dendenes, vuz familije, z pravnukima, v tim letam...  Kaj, sad puzate spod plota?  (Smije se)

M: To ni po istine i kvit! Naj danjgubiti z laprdanjem, mam da si mi skuvala juvu z domačima, friškima rezancima i spohala pileka. I, ja se ne mešam v kumekove posle, naj ni ti. A po pitanje Veruške...

J: Ni ta cinoberasta dovica bedasta, svaka ne čast. Dobro joj je išlo vuz vas selake. Ko joj je donašal več darekov i penez, ti, kum ili Rundek? Tri bedaka je za nos vlekla, kuliko se zna, a selo je imelo domaču, pravu seriju v živo. Po istine, ne tak dobru kak „Mejaši“ ili kaj „Gruntovčani“. Ali blizu, z olivudskim naglaskom na passion... hotništvo. No, lotriju. Kaj zuriš vu me? Kurvanje, na standardnomu kajkavskomu, ak ti još ni svelo. 

M: Baba, zapri škrebatalku več jenput. To je vse od tega vražjega Gugleka kaj žnim danjgubiš.

III DIO

J: Reči mi po istine, komu si denes platil pijaču v kafeju pri “Plodinami”?

M: Nikomu, kaj bi išel nekteremu plačati pijaču. Ne dam peneze za kaj got.

J: Lažeš, pak. Meni si naručil kavu i jen mali Amaro, si ga ti spil. Si pozabil ko je ztebum bil, morti Vera, nesi se štel odati, jelda?

M: Am sem od strava pozabil da si ti bila zmenum.

J: Bez teke več niš. Vsaki dan buš napisal kaj si mi lagal. Onda ti bum spohala pileka z tenfanim krumperom i sosom od gliv.

M: I zelenu šalatu. .....  Ma, čuj ti jena obična ... Ti buš zmene norca delala. Z pohanim pilekom me mitiš… To tak nepe! Nikak! Ja ne spelavam laži i basta!

J: A jelda? 

M: Julkica, ti se huncutariš zmenum, kaj ne? 

J: Ni mislit. Vučenaki trde da muži v braku lažeju bar dva put na dan, a stručni lažlivci čak šest put na dan. 

M: Kak ne razmeš, lagali su na istraživanju! 

- K R A J -

-------

¹Manipulacija i iskorištavanje žene u svrhu seksualnog i/ili financijskog iskorištavanja.

²Bubalus bubalis, službeni je nositelj Guinnessova svjetskog rekorda za najveći ikad zabilježeni raspon rogova kod bilo koje žive životinje.

³Neuropsihijatrijska bolnica dr. Ivan Barbot.

Manje poznate riječi: spominati – razgovarati; fkaniti – prevariti; smutlivec – spletkar; čelenka – glava; zginuti – nestati; milosnica, flojza, mužača, flundra, šoca – ljubavnica; lotrija, kurvanje – preljub; šlabekuvati – brbljati; cinoberast – lukav, snalažljiv; škrebetalka – čegrtaljka; tempfani krumper – krumpire pire. 

Donjemoslavačka kajkavica Grada Ivanić-Grada i bliže okolice.