Autori pohvaljeni na 8. natječaju recitala kajkavske poezije "Stara lipa", 2026.

Pohvalnica

Lidija Šustek, Vrbovec

Megle meglene

Megle meglene

kak joči su snene

pak se ne vidi

el su vrbe

el su breze 

el su lasi raspletene?

Megle meglene

Kapljice su rose tkale

na paukovu mrežu stale

prav čovek ne vidi

el su vile, el su žene?

Megle meglene

mesecu su srebra krale

breze posrebrile

vrbama su plašta dale. 

Megle meglene

sad su vile - sad su žene.

Megle meglene

međ granama se rasplesale

rujnim zrakama meknule.

Megle meglene

sad su vile, sad su žene!

Megle meglene.

__________________________________

(govor Vrbovca i okolice)

megle meglene – magle maglovite;  joči – oči; meknule – maknule; el – il, ili  ***

Ružica Marušuć Vasilić, Varaždin

I mi smo bili deca cvietja

I mi smo bili deca cvietja, A da to niesme nit znali. Prepovedalo se da tam daleko,

Prek bare, tam gde sonce zahoja,

Dogaja se niekvi Woodystock,

Urlaju gitare, Jimi Hendriks

do neba razapija žice.

Janis  Joplin plačnim glasom                                                                                           

razvloči svoj blues rock.

Hipyji bosi i puni sna

Popevaju pesmu o slobodi.

Oni su bili naši vršjaki,

Ali iz bogati familiji.

Lefko se jim bilo

Po ciele dneieve zležavati

Slobodni se ljubavi podavati,

Vu drogi užitke iskati.

Ali so oni digli svoj glas

Protiv rata - za pravu stvar!

„ Make love , no war!“

A mi jihovi vršjoki

De smo bili mi,

Kaj smo bili mi?

Mi niesmo meli bogate stareše

Pa smo morali delati,

Poslušni biti i vu semu 

Jim pomagati.

Puce so si dečke iskale

Kaj bi čem prej otišle vu zamuš,

Dečki so delali vu fabrikaj

I na železnici kaj bi čim prej

Došli do svojih penez.

Ak si je koji koražneši dečker 

Pustil doge lasi,

Začas je kod stareši došel

Na veliki špot i hudi glas.

Ali i mi smo bili deca cvietja,

Dišali smo ga i brali

Na našim senokošama.

Od tratinčic i ivančic

Pleli smo si venčeke za deti

Okoli vrata ili na glavu.

Al mi nigdar nesmo bili hypiji

Makar smo svoju  mladost

Živeli vu isto vrieme ____________________________________

prepovedati-pričati; stareši-roditelji, stariji ljudi: puce-djevojke; čem-čim; zamuš-udaja: iskati-tražiti; koražneši-hrabriji; špot-osuda,sramota; jim-njima; vršjoki-vršnjaci; dišati-mirisati; venčeki-vjenčići

***

Slavica Sarkotić, Vukojevac,  (posvećeno Dubravki)

GASTARBAJTERSKA NOVA

Jutro je

Sunčece rasiple koloplet farbi

Po živica i po stezami

Na rosnemi travami riše akvarele

Ona hodi

Za sobum vleče svoje šezdesetpet let

I kufer ogulen od nošenja

Svoje je na poslu odgulila

Ali ne bilo dost

Žuti cvetek vuz stezu ju zove

Vrni se, ostani

Primekne mu nos

I malo žutoga peluda ponese f tuđinu

Misli na starca teri je ostal doma

S škrinjum punum zmržnjene obrokof

Cug več fučka, se je bliže

I gda vu njega sedne i otpuhne švicna

Jen fakin bu drugomu rekel

Viš kak ova baba ima žuti nos

I smejali se buju

Ona se bu napravila da ne čuje

I čez obluk bu gledela

A tam v Italijami i Austrijami

Čakale buju gospe Gerde i Hilde

Blizu devedeset let stare

Omotane z dekami od kašmira

i v majica od angore

Nemočne čakale buju

Da dojdu Dubravke i Marice

Čiji su nukeki ostali v domaje i čakaju

Da je negdo drugi otpela do škole. __________________________________

Govor Vukojevca, Turopolje

obrokof-obroka; obluk-prozor; cug-vlak; švicna-znojna; nukeki – unuci; otpela – odvede 

***

Stipković Franko, Zagreb

Mertvi

Vrnul sem se

z putnom taškom v ruki

idem ulicama detinjstva.

Srečem nepoznate žene i muže,

nepoznate puce i dečke.

Si oni mi veliju "Dober dan!",

ne znaju ni gdo sam.

Ja sem same jeden od onih,

šteri su negda,

mladi i živi,

išli ovim istim ulicama.

Ostale su iste ulice,

iste hiže, ista vrata i obloki,

samo nas nije više tu.

_____________________________
Lepoglavski idiom

Šteri - koji; oblok - prozor

***

Stjepan Zlodi, Šiljakovina

Licomerec

Licê méri vsako rêdom,

licomerec, vsê bu zmeril,

vsakem jâjcu glaku nâjdê,

vsaku škrijnu on prevrnê.

Sêbê ne gledi,

himbenik, vsê bu zmeril,

vsê kaj drugemi zaméra

sâm jê napravil prék na prék.

Jâlnost nêga tira,

licê méri, vsê bu zmeril,

taj skazlivec, blâznik, prilizavec,

potmajnik i prêtvorica.

Vsaki kamen, drévo bu pomeknul,

svojê prstê vsêkam teknul,

prevnul i sokril taj prevrntâš,

črvê, gliste, kukcê i pavukê.

Drêkokopec licê méri,

z očijami, vsê bu zmeril,

z gnojem sê nahitâva,

nigdo nêsmê čist ostati.

Zestali sê drêkokopci, zatrdili nosnicê,

grabežlivi, vsê su zatackali,

v gizdave vojne stojiju,

preštimâno smrdiju i v nêbo glediju.

Sêbê nêju merili.

__________________________________

dijalekt: vukomerički

licomerec - prijetvoran, licemjeran čovjek, licemjer; himbenik - obmanitelj, licemjer, zlobnik; skazlivec/potmajnik/pretvorica - onaj koji se pretvara, prikazuje drugčijim neto što jest, licemjer, himbenik, pretvorica; blaznik - onaj koji psuje, kleveće, laže; prilizavec - onaj koji se ulaguje, dodvorava; prevrntaš - onaj koji prevrće; preštimano - ugledno, časno