Katarina Zadrija | Strina

Jeste morti vidli denes ženicu kak se vojzi na mouškem bicikljinu?

Pedeset kil skup z bicikljinem.Vojzi vreču kroumpeira zavezanu zned štanjgi. Male rievlje, male se vojzi. Ide na bus, vojzi kroumper dece v Zagreb da nedu otrova kupuvali na placu ili v dučanu. Se je to ona doma sadila i njegovala z svojemi roukami. Jutre je kravicu naranila, biku krme hitila, prasičke i prasice z odojki napoja dala. Purane i kokoši za štegelj pustila. Još se i k mene navrnoula.

"Miljek, sem ti jajec donesla." Kak si? Ti je kej trieba?"

To je moja strina. Ženica koja z svoji osemdeset šest ljiet još z traktorem orje i grunta obdelava. Sem ju pitala da zake se mogući, em je nie sila. Pak mi je odpoviedla:

"Čuj, ja bi od srama ljudi vmrla če bi mi grunt bil zaraščen. Bi me Boug kaznil. Same niškoristi govore da se od grunta nemre živeti. Ja ti furt pomalu dielam, pak si neke i priskrbim. Znaš, misljim si da sem v raju. Večer si pogledam seriju i moljim se Bogu. Ne bi drugač mogla živeti."

Bila je najljepša cura v kraju. Drobna i tenka, hitra i marna. Od dobre familije. Na glasu. Navek najljepše priređena. Gda god doujdem k nje seti se svoje mladosti i življenja. Rada povieda otem :

„Znaš bila sem tenjka, brez koukov, a same su na ciene bile debele, ritaste i koukaste. Mi je mama složila kouknjaču (nešto kao kratka podsuknja od domaćeg platna, jako naborana koja je mršavim ženama i curama služila da ih malo „podfutra“, tj. podeblja. op. autora). Gda smo išli k meše kouknjača je mourala biti. Več su si zišli z hiže vun, a ja sem rekla da mouram na stran. Oni su več na poutu bili gda sem je vlovila. A same sem kouknjaču hitila na postelj. To ti je mene žuljale. Mama me poljek toga špoutala da me nište ne bou štel. Senjek se moj od mene ni dal odvrnouti.

Bil je ljiepi. Črni lasi, ni jen mu brat nie imel črne lasi, to mu je bile po matere, hrđave oči, a veljik i jak kak i oča mu. Nie on nigdar bil debel. Se zmisljiš? Ni pod stare dane mu nie pužlje visle. A gda je zapopieval! Imel je glas, ciela fara je čula šte večer po poutu hojdi.

Nie ti to mojem bile praf. Bil je najstareši od više brače i sestri. Imelji su grunta, nem rekla, je pokounji sveker nakupuval, alji je on moral otiti z hiže, nie imel kam ženu dopeljati. Govorile se da mu je oča matere zločest kak vrak. Tak su i mene govorili da boum k hiže dopeljala golorica, koji me bou još na mojem toukel.

Nemreš ti protif srca! Se su se dekle na zabave napred rievale, jelji bi morti baš ž njou išel tancat. Rada sem ga gledela, a on mi je onak poskrivečki, na finem nažmerknul. Misljila sem da sem na nebu.

Govorile se da hojdi i k ove i k one, k dovicam i mladem sneham. Da je poul fare preko rouk prematal.

Štimale se mojega Ljerke. Poviedali su da je po noći k nje čez oblok skakal. I da nie jedini, da rada ona pušća i dečke i mouže k sebe, kej je noge grieju. Bila je bogata i naprčena, misljili su da boudu mojega z bogatstvem kupili, alji se nie dal. A onuda je Ljerka išla v zamož. Njenjin si je oča bil veliki pajdaš z pokunjem svekrem, još od gda su tam negde v Srbije za kralja Petra vojsku služili.

Vojzil ju je stric ti, na venčanje z onem kej su je naštimali. Nie više imiela kam i nište ju nie pital.

Morala je zeti koga su je našli ilji biti stara dekla. Poviedali su da je mouj konje tak fejst potiral da su na zavoju skup z mladenci završili v grabe. To me je grizle navek, kak črv kouru. Kuljike se god klel da nie ž njou niš imel, niesem mu mogla veruvati.

Vič kak sem drobna. Gda me privinul bila sem mu pod pauzi. Pak mi je rekel da mu je moja glava navek na srcu. Tak je ljiepe poviedal i popieval da nies više mogla brez njega. A ounda je jen dan došel k mene gde sem pasla krave i rekel da me ne nigdar ostavil. Da mu je mati klekla pred njega i z sklopljenemi rokami ga prosila nek se mene mani poradi toga kej smo si rodbina. Če ja njega oču, nie ga briga ni za sele ni rodbinu, on oče same mene. Pitala sem mamu za rodbinu, pak je rekla da su si naše prababe bile sestre, da su njijovi našu babicu na ostavine sprevarali i da ona njega neće pri hiže. Ja sem rekla : "Ilji on, ilji ni jeden. Rajši boum očla med časne sestre".

Niesu ti to bile nikakve gosti. Si naprčeni, saki na svoje strane. Upraf me bile stra gledeti rodbinu. A mouj me same k sebe pod pauze stiskal: "Niš se ne boj, ja sem tu". Ne bi ga taj čas dala ni za cielji sviet. Cielu smo nouč tancali.

Je, poklje gosti se bile treba dela prijeti. Delali smo skup kak jeden, on je delal za tri takve, nek bi mojem pokazal da vriedi. Skup smo bili kak zaprežena maršad.

Pred sakem se faljil:

"Senjal sem da boum dobil najljepšu i nafletnešu curu. Takvu mi je dragi Boug dal. Moja žena more konje i kola preskočiti. Ni jedna je nie ravna".

Bil mi je dober, ali gda se dela ticale, delale se dogda se nije zgotouvile. Tu nie bile popuščanja. Imiela sem ga rada i gledela kak bogeka. Niš mi nie bile teške. Na hitrem sem i neseča ostala. Nies imiela tešku noušnju. Niesu me ni k delu preveč tirali.

Narodil se dečec. Bratič ti. Dijete je bile tučne. Rada je cical. Senjek, neke nie valjale. Nie se odzival, nie čul. Poklje gda je bile doba da bi govoril, ni govoril nie. Same se plakal i vikal kej nište nie mogel razmeti. Bile mi je kak da me stotine noužov bode v srce. A on, stric ti ,same se vu sebe povlačil i v posel zakapal. Znaš da je mouj tata očel još gda smo ja i sestra bile deca. Deda je bil glava pri hiže.

Gda je videl kak se grizem poljek deteta i kak on same čkomi i grize se, rekel je: "Pusti ga, nek ga jad prejde:"

Jenu večer si je mouj popil i zel nouž da si bou srce prebol. Vikal je da je on semu krif, da su si bili protiv te ženidbe, a on je na silu išel, f truc sem i da nas poljek njegvoga truca boug kazni.

Najrajši, da mi nie bile do deteta bi i ja vmrla.

Dečec je rasel, vidle se da nie bedast, spameten je bil same nie čul ni govoril. Imeli smo ga si fejst rada.

Jenoga je dana mouj rekel: "Čuj, ja bi rada još jene diete, morti bi bile se v redu.

Rodile se i druge diete. Dečec. Se je bile jednake kak i z prvem. Preko jenoga od toud smo v Ameriku poslali se papiere od doktora.

Na hitrem je odgovoril:

"Oštečen kromosom koji gospodari z sluhem, govorem i videm. Vaša deca prede smrti ne same kej nedu čuli i govorili, oni boudu i osljiepeli. Savetujem vam da je date v škoulu za gluhonieme nek zvuče zanat da boudu imeli od čega živeti. Krivica je vu vami. Obodva imate oštečen taj jednaki kromosom i če se dva takvi najdu rode se takava deca. Jeden na stou, a privam su obodva takvi. Če je boute v škoule dalji, mogli bi imeti ljiepi život."

Vele da je to, taj kromosom neke v krve kej se prenosi na potomke. Kej god da je, nam nie donesle niš dobroga. Brže bolje je on išel po Zagrebu placa iskat. Našel je drvenu hižičku. Brati su mu pomogli zozidati zidanicu. Gda su deca porasli dali smo je v škoulu. Mama se žnjimi tam preseljila.

Ja sem saku sobotu i nedelju išla na plac. Gda sem se prodala sem si i dece sega kupila i k njim se navrnoula.

Bili su dobri, dobre su vučili i ljiepe crtali. Znaš se je to bile v redu, senjek mi je najtežieše bile gda su drugi išli na pričest i na fiermu ili gda su bile škoulske priredbe. Moji su bilji daljeke, nigdar nisu popievali ni reciteirali.

Zvučili su zanate. Mouj se ž njimi štimal. Bili su bolši đaki od nekoji kej su i čuli i govorili. Se ljepše su crtali, su njim z udruge za takve ljude slike izlagali.

A život kak život. Moučilji smo se na polju, on je po semnji za mesare blage nakupljival, ja sem išla na plac. Prifči se čovek k semu. Em nemreš navek premišljavati kej bi bile da je bile. Živeti se moura. Bile je i smieja, nem rekla. Jeden znaš onaj z drugoga sela, kej je po selji jajca kupuval i na plac nosil se navek gizdal kak on se prvi proda.

Je, ali su ga jempout gospe dobre oprale. Bile ji je par okolo njega. Cifrale su mu te kak su mu jajca friške, te kak je fleten, a on bedeak bedasti se ž njimi šaljil i nie si na jajca pazil. Došla jena bi je premenil peneze. Gda je nje mienjal debele v droumne, druga je jajca v ceker metala. Su ga tak zmotale da je ostal brez jajec i brez penez. Smo mu se si podsmejavali kak ima fine friške jajca. Drugi pout je same vikal: „Jajca, jajca, peneze ne mienjam, same jajca tržim“. A mi ženjske smo krepavale od smieja. I naši mouški su ga po selu zafrkavali :“Matek imaš fine friške jajca“.

Stric ti, znaš ga dobre, bil je prefrigan. Čule se kak gda otide z moužmi na zabavu z saku tanca, a mene je na kratkem držal. Pazil je kam idem i sekam smo skup išli. Čak mi je pod starost priznal da je za doumlju na plac znal otiti. Ja v jenem vagounu, on v drugem, da bi videl da se kakof ne bi mene zadel. A ja, ja ti nies nigdar nikog drugoga pogledala. Vič život je prešel, on je očel na onaj sviet, deca su v Zagrebu, a ja sem sama. Nie mi teške. Kuljike god bi ga najrajši zadavila gda me teral v škoulu za traktora vojziti, gda me vučil z stroji delati, sad sem mu zafalna. Kej bi ja denes napravila da si sama ne znam se delati? Šte bi mi kej? Ni za plaču nište neče delati a kamolji da bi ti kej pomogel. Ovi selski su si gospoda, a onaj gospon kej doujde z Zagreba k mene neke si kupiti, mi pomore gda kej god dielam. Joj kak je bile smiešne gda je išel štalu snažit! Krava ga je z repem po glave, a on je bil nadišan kak kakof kicoš. Niš to nie njemu bile. Prosil me lavor i sopun i čovek se opral. Ovi domači pak same cucke šeču,a po polju njim raste trnje.“Završila je pripovietku moja stirna,

"Strina ja bi Vas na radio dala."

"Niti dabi! Sem mislila da si ti spametna! Kej bi norca od mene dielala?! Z mene nište ne bou cirkuse delal!"

„Na jajec si zemi. Rada bi te z kolači ponudila, ali nies dospela speči. Bil je on gospon tu. Kupil si je odojka i pure, pak je štel i se jajaca pobrati. Znala sem da bouš ti došla pak ga nies pustila v kokošiljnjak. Niš ti se njemu ne duri. Zanji pout je jejce z gnoja spuknul. Sem mu rekla nek to hiti, pak sem mu od sebe jajec otpustila. Jena mrcina mi je pričela v gnoju nesti. Boum ja njou vlovila i zaklala, tak nikakve koristi od nje. Na gnouju nese, nemreš to jejce nikomu dati. Če se mene duri, kak bi drugem prodala?

Gda mi bouš pak došla? Em znam da imaš brige i posla, ali te navek rada vidim.“

„Boum strina, boum“. Poskrivečki brišem souze. Kej boum ja brez nje, dok ju dragi boug jemput zeme?

„Same si decu na vrpe drži i dielaj. Tu ti se se vljienele: Neće imeti kokoši, zate kej bi je rouže pozobale, krava smrdi, vrčaku se teške prignuti, svinjam je teške snažiti. Po povrtelje, jajaca i mese se ide v dučan. Najprve su išle k mene, pak su štele zabadav. Rajši nek propane, nek da ranim niškoristi. On veljiki gospon doujde sim i ne duri mu se prste v drek porinuti, a ove dreka po selu špiljaju gospodu. Ide sviet svojemu kraju. Same ti miljek dielaj, sega bouš imiela. Niš se zame ne staraj. Ja nekak boum“

Prižižem auto, dajem gas nemrem več souze skrivati, a ona sirotica drobna stoji na moustu i maše.

_______________________________________________________

obdelava – obrađuje; odpoviedla – odgovorila; če – ako; furt – stalno; drobna – sitna; marna – vrijedna; na stran – u toalet; pužlje – drob, trbuh; fara – župa; praf – pravo; rievale – gurale; naprčena – puna sebe; v žamuž – udavala se; maršad – stoka; najfletnešu – onu koja je za sve; neseča – trudna; noušnju – trudnoću; tučne – napredno; podsmejavali – ismjehivali; za doumlju – zamnom; zadel – dodirnuo;