Klopoteci vu mrkle čkomine
Kak mucavci na festivalu fletnih jezikof.
Optrgavati snieg vu času žetve hrži, prejti se oprati na mrzlome potoku.
Zaspati vu osinjem gnijezdu i kaču vu hižu na obed zvati.
Jalof je to pljuček i naopačni sviet.
Jafki nemreju zdiči anoreksnične pameti kad se po putu čovek zgubi a doma se vrne kak rogati mračnjak.
Pepel se zdiže z vetrem črnim kak kiklja biele udovice.
Ftihle su kriesnice i mužika črčka.
Pomrčina se zabila vu sunčeke
I ne pusti ga da nam zgrije življenje vu ovem denešnjem sivem zdanju.
Jalove je vse: danec i mrak, nebe i črna zemlja pod hromem korakem, pisana rieč i popievka, posel i spanje.
Prevrnula se kuola seljaka i gospodska truga, zasipale se mučne stanje nad cieli ubogi sviet.
Kaj bumo zdihavali zdej?
Zdiči se trieba i lopate i srpa se prieti.
Počistiti denešnje stanje i požeti nuove ufanje i nadu.
Morti se tak ciepime od ovog naopačnoga vremena i vu zaborav hitime vse mučne z njime.
_______________________________________________________________________
3. nagrada: Brončani Kaj 2021.
Nema komentara :
Objavi komentar
Hvala na vašem komentaru. Isti će biti objavljen nakon pregleda moderatora.