Gordana Burica | Tice na dar

Povučiva je masivnu ručicu i 

krakun na vratima

od crikve,

svon forcon.

Beštima je u toj svetoj kući

na cili glas.

Uzalud.

Pa je mrak i crikvu su zaklopili,

jušto dok se bos skalava

(zato ga nisu čuli)

s kanpanela.

U iskidanin gačan, ostacima ničega

 ča je bila košuja,

devetogodišnji Dada,

uru prin se pope u kanpanel,

jer su mu rekli da se 

gori, u jednome kantunu

ležedu kosirići.

Već je jema kupca,

drugoga, bogatijeg dičaka.

Sve ča je uvati na redima Izvanja

zadnjih dan,

bi je darova drugoj dici.

U to vrime,

petnajest dan puhala je južina.

Na Izvanje ni moga.

A padala je i gruba kiša, bi bi popuzi.

U prošlu šetemanu,

noga mu je poletila.

i zamalo mu Izvanje,

koje mu je bilo dom,

ni postalo i njegov greb.