Slava Rosandić | Kaj se v loncu kuha?

Na presvetlu nedelju, bormeš masna juha.
V pondeljek se nedelni ostanjki jeju,
i to picek, racek ili pajcek.

V torek nas čaka težački posel:
se nahrmbaš kakti osel.
Najbolše paše grajek z kiselom repom
i prasečim repom.

V sredu se človek več čistam zasiti zo kuhariju,
pak si nareže špekec, lukec; em se razme – k tomu friški kruhec!

V četrtek diši saftek zo žganci,
A morti se prilošče i slatki rezanci.

Petek, kak svetek, mora se postiti i mesa lišiti.
Ondak šmeka gibanica, štrudla ili makovica.

A v sobotu, hladetinu i koruzni kruhek smažeš,
Ak gladnuš ogladniš –
Kem si putrek namažeš!

Bliži se nedjelja – mlince treba slagat.
Joj, mamek,
kaj pak moram vam pomagat?