Zdenka Čavić | Čudliva reka

Čudliva se Drava gible,
peniju se beli vali,
v koritu glibokem,
v rukavcu širokem,
brbučkaju, vrljuže.
Krištali se ziblu
v mojemu joku.
Štela bi zajti v tu gliboku,
zapenjenu bistru vodu,
napojiti srce z milinom,
z kapima škropiti kožu.
Bi štela Dravu piti.
Kuple se duša v ti vodi,
porodila je sreču,
porodila radost deteču,
kaj čkomela je v meni.
Svetli na ranje v svili srebreni.
Gda ju gledim, se veselim,
zaneslivo poslušam vale,
kaj drhču, kopiču se po kamjenju,
neba i zemle znamenju.
Vrljuži reka svoju popevku,
brbučkaju iskre rojenja,
zaiskri se v vesmiru celom
del večnoga zorjenja.