Eda Budić | Ilirke stvarajo novo pismo

Ono ča smo spravljale
po lonci, po škatulah
šenjale smo svako stvar drugajče.
Nikakor se ne smie zmiešat
da se ne bi desilo kakovo slabo .

Glejte,rožice i trave suhe so
jušto jednake.
Lahko je ziet jeno za drugo.
A mi škrbimo za svoji
da se ne bi desilo kakova slabo .

Potle je svaki šenjal dobi svoje ime.
Počelo se je pisat čudesa
za kajsta nismo znale da so na sviete.
Mi smo samo stele
da se ne bi desilo kakovo slabo.

Bili so se spensali da so neki drugi, furešti,tako počeli pisat i nas navadili.
Nas niso zabili ač nas niso
nanke teli zapoštat.
Da se ne bi desilo kakovo slabo.

Ne porta kako smo se zvale.
Bile smo,kako i vajk, matere,sestre, hćeri,
onejste ke zidajo i čuvajo sviet.
Čuvat ćemo i vas.
Da se ne bi desilo kakovo slabo.

---------------------------------------------------------------

Fotografija: Glagolski prijepis, Tomislav,Beronić