Aleksandar Horvat | Kolendar na vetru

Kolendaru otpada listje.
        Z njim, vsa pijana protuletja, zgublene letne dane,
        prazne nezrečene reči, cele komade srca
        i blede ostanjke dobrote,
        nočni veter raznaša v slepe vulice grada
        i tam jih zavrti vu kmicu,
        vu veternu coprnicu.

Vre se k tomu cela slika rastoči.
        Rukovet praznih, meglenih noči,
        talog na silu zgublene pajdašije,
        stranjske žalosti, priprte joči,
        sramote, laži i hurmalije,
        grbu na hrptu, na gležnju karike,
        netečno vino, spotrte flaše,
        skurene črne i bele slike,
        nigdar odmolene očenaše,
        zašite luknje zdrapane duše,
        žal za srečom, čkomeča trplenja,
        tate, dužnike, site gladuše,
        vsako drobno smetje živlenja,
        i još kojekoga, i još koječega,
        veter nagrne na vrpu kaj sprhne.

Gda vse se vlegne, kak humka na grobu,
        samo pesme, gliboke, žmefke, a srečne,
        na lefkomu papiru odphraju v nebesa
        i tam ostaneju večne,
        zapisane, za nami, za nekoga, zanavek.

Kolendaru otpada listje v jesen živlenja.
        Dok veter mine,
        ostal bu prazen, beli, zimski zid.
        I čavel.