Zdenka Čavić | Kača od peska

Nebo kotura rastepeni pepel,
zemlu je raskolila suša.
Kaču od peska veter riše.
Streščeni zvezdi skradnja je vura.
Po soncu žarečem
kaj ne stere suša,
dojde led i potere.
Zdeni veter puše,
nese se pred sebom,
gospodari žarečim nebom.
Velke su sile zavuzlale vuzle,
čoveku stenjile vreme,
zeleno i plavo zemle
po času ne bu videti.
Čovek misli da je gazda semu.
Al došla je plača mu za dela,
ostala ne bu ni šaka pepela.
I njega bu i delo mu zela.