Kajkavsko najže (9): Dedina leskova bota

Piše: Aleksandar Horvat

Gda čovek prekapa po najži, furt je zagledani nekam v kmične kute, med kupima starih stvari. Premečem i prekapam če bi kaj vrednoga spomena našel, a gda sam se, tak prigjeni, malo zravnal kaj mi se križa odštekaju, pogledam gori i zgledam staru dedinu botu zateknutu pod roženicu. Ta je bota stareša nego je naš deda, vre da je još denes živ, jer on ju je, kak je govoril, herbal od svojega dede.

- Ne vredi od leske deska, - govoril je deda - ali dobra je leska kak bota. Moreš od nje napraviti i ribičkoga prota, splesti pletera, kuružnjaka i za povrtelje napraviti količa.

Bota je na držali imela frugu kaj je bila slična kak čovečja glava. Od dedine je trde kože bila zaglancana. Deda bez nje nikam ni išel. Malo je pošepaval i gda je botu imel, sigurneše je hodal, makar ju je negda samo v ruki držal kak zaprto jembrelo. I ni to prvi put kaj bi čul da se ljudi navežeju za jenu sitnicu kaj jim živlenje drži na kupu. 

Gda je deda v bolnicu išel da mu nofta spukneju na nožnomu palcu, kajti mu se vrasel i zagnojil i jedva bi na nogu stal, tam su mu leskovu botu zeli i dali jenu novu modernu z lepim držalom u gumenom petom. Gda je v bolnici polegaval i babica je iznenada hmrla, od starosti. Čez jen čas se vrnul k domu, ni bilo niti babice niti leskove bote. Takov žalosten i bez volje, z ovom novom, nacifranom i glanc lakeranom botom ni nikak bil zadovoljen, rekel je da je preduga i da nema lepoga “glasa“. Gda je na koncu i dedek odišel na obračun k svetomu Petru, za botu se nišče več ne zmislil niti o nji govoril. I gleč ju vezda, zateknjenu za roženicom na najži stare hiže, čeka da se spomeni nazaj vrneju.

Ne zna se točno kaj bi bota rekla če bi pregovorila. kak je došla sim na najže. More biti da ju je babica tu pospravila gda su mu ju z bolnice dimu poslali, a ni bogica stigla nikomu povedati. I viš, da je dedek morti znal za botu i imel ju pri sebi, morti bi još keje leto imel volju živeti, kajti bi se čutil kak čovek na mestu. Ali to mi živeči nigdar nebumo znali.

Leskova bota je dva čoveke nadživela, od črva se obranila, a morti je i na najži neznajuč čuvala hižu od kletvi i skažnji. Takve stare stvari bi mogle meti sikakve moči. Makar ji se kora sejeno malo lušči, čovečja glava je znucana, a peta zlizana, botu bi još nevek nešče mogel kak zaštitnicu v ruku zeti. 

V spomen na dedeke, gda prvi put zašepesam, ja si bum ju zel, pak nek i dale ima svoju svrhu. A ove nove zaglancane nek si nosiju doktori i gosponi. Takve su samo obično drevo.

(A. Horvat 8/2025.)