Eda Budić | Zakuon

 

...pak san jas storila

ono ča već od zdavni ni modierno,

priegnula san sve ča je prišlo,

smieh i plač,

ne rada i ne ot svoje volji,

i probijala se kroz lazi va grajah,

i iskala i škrbno gledala

kade so puoti

po kejsteh najmanje pasievajo

diblji prahci , oholi šufieri i žice pune struji,

plakala ( o, kako san plakala, na glas!)

za onejstemi kijsti so se zgubili

ali san hi jas zgubila,

smejala san se da je bilo čut do kraja svieta

kat je ki muoj bi dobro i štabelo,

tako još ot kat san bušala križ 

na maše ot svojega zakona

i bi reć da će tako bit do kraja.

__________________________________________

zakuon- ovdje : vjenčanje, 

priegnut - prihvatiti, 

laz- prolaz, 

graja- živica, 

maša ot zakona - vjenčana misa