Eda Budić | Leto

kako sad povedat

kakovo je to 

bilo leto

kat smo frmali veturo

puli puot

i kalali se po one staze stazice

va Mirnino korito

va hlad va freško

kako je voda 

spod tunela od dubi

bila mrzla i ugajala

skroz zeleno granje

videt je bilo nebo

smieh je bilo na dugo čut

pak smo partili po ceste zguoron

slikali se

puli oni liepi portuon ot kuorti

va kejste je bila zrušena kuća

potle so je na novo uzidali

za turišti

još ni bilo mobiteli

još nismo toliko tega teli

samo ono ča ni moguće bilo

ni oni put ni sada

da sve ustane

da se ne kambija

____________________________________

frmat- stati; vetura-auto;ugajat-goditi; partuon- ulazna vrata; kuorta- dvorište; kambijat- promijeniti