Đurđa Vukelić Rožić | Štalsko doba

Prek vikenda znami je bil naš najstareši vnuk Luka, milenijalec¹. Ja mu tepam moj Mileni. Inače, imamo vnuke generacije X i genercije Z, a kaj bi im vraga lepili etikete na pleča, znamo je od anjpideklina. K nama dojdeju na ferje a znaju i huncutarije spelavati na naš račun, toboš smo još vu Štalskomu dobu.

Luka je dopelal svoju deklu na selo, taki. Gradsko dete, imenom Linda. Skup studiraju več nekaj, nikak zapametiti kaj. V žep od fertuna sem porinula komadić papera i Ikejin plajbasek da bum brže bole zapisala kaj je v pitanju. Študiram si, ko zna gde si buju pemziju zaslužili. Dobe radni stol, kompjuter i telefon, ak bu srečice i oblok naj bi videli dana i sunčeko. Dobre, ne i East River² ili Brooklyn Bridge, no morti se vžijeju Slemena ili Drave, takvoga kaj. I sad, ne bila ja Ifkica, v kaj got pehnem to ni onak kak zgledi. Te East River (Istočna reka) kaj se dotikavle Manhattana je zaprav potopleni ledenački dol.

Nadale kaj se dece tiče, ak magistreraju buju popravili našu hrvacku statistiku, a i ak si prejdu zaraditi za stan i avuto v Švicarku, Škotsku, Švedsku ili nektero drugo slovo abecede. Privčila sam se na deklino ime. Ko zna ktera Linda je inspirerala nejnu mamicu i imela ju je rada. Kaj se mene tiče, moje ime Ifkica bilo je popularno u vreme Selačke bune, gda su kmeti digli puntariju proti Franje Tahyja. Istina, ja sem se rodila kesneše, a moj gazda se sprda: „Je, malo kesneše!“. Srečna sem kaj su mi moji dali naše starinsko ime.

Linda je štela pomoči ze vsim poslima v hiže i na fundušu. Krumpere je tak debelo belila da ju naše prasice Julka i Jerka nesu nigda pozabile, tak su se slatko najele. Morti sem im trebala pommes cortex frites narediti, nis se setila na vreme. A bi majstori torbari i tri taške sfkrnuli od obeltinja od jabuk kaj je za štrudel oblupila. Torbe se v ovo doba delaju od kaktusa i jabukine kore a paper, da prostite, od slonove kakice.

Fertun kaj sem ga Linde privezala da si robu ne zamaže v kuvinje je za pol vure zgledel kaj da je žnim brisala prašinu z gnoja v ove naše Štalske ere. A, da bi reč rekla, kaj bi se išla mladomu stvorenju zamerati. Samo sem poslušala kaj pripoveda nadajuči se da bu rekla kaj studiraju. Bi si to skrivečki zapisala i z Guglekom se konzulterala. Tak da se morem o temu žnima spominati i nekaj novoga navčiti. Zajne vreme se UI meša vu vse a, kaj sad žnum? Am sirota ne razme kaj na zaslona splune. Podseča me na papagaja v krletke.

Vučila sem Lindu kak zamatati buhtle, gda se pečeju da pekmez ne scuri van. Gnetuči digano testo laprdala je kak voli svoj studij kulturne antropologije³. Bem ti mraz, ja brže-bole beš v sobu, toboš po rezance za juvu v škatule od čižmic, i zapišem. Kulturna antropologija. Za antropologiju i etnoarheologiju sam več čula, čer susede Jane je etnologina. Bormeš nis znala da te navuke ima i nekulturne. Ak je antropologija naše dece kulturna, valda bu na dobro zišlo vse. Otprem svega kompjutora v sobe, na brzinu oču prečitati nekaj o te teme i onda mi se presvetli; ta su deca došla zučavati moju i Jožekovu zavostalost.

Ono kaj ja razmem je da je to naše Štalsko doba puno mlajše od Ledenoga doba kaj sme v nemu grezli. Sad, v tomu Ledenomu dobu je vruče kaj v peklu! Po istine, jeni vučenaki misle da to je, a drugi da ni Ledeno doba. Držim da se o štalskomu dobu nebuju tak skoro složili, taki. Am kravice svojim mlekecom rane Homo sapiensa bar deset jezera let! Klanjam se i poštujem je, pod bor saki Božić štalicu denem.

Neču priznati da sem se zgubila vu semu tomu, slično kak nekteri dan gda sme vrganje brali na naše prelepe, šumovite Moslavačke gore. Gda me je našel, Jožek je kričal na me da mi bu obesil klepku oko vrata. Po istine, ja sem si na penu baš lepo odremala i počinula v Božjemu miru prelepe huste. Ni problem kaj sem se ja toboš zgubila, nek je on iskajuči me nabral bar dvajst kil gliv, trebalo je to nositi... S druge strane, morti mi se puno toga presvetli stom kulturnom antropologijom naše dece. Prečitam nejni esej kak rečimo: „Seljaštvo prije i poslije Stajske ere.“ Ili „Tihi odlazak Tihe generacije⁴ i Stajskog doba u vrijeme kasnog kenozoika“.

Za decu je naše gospodarstvo zaprav živuče arheološko nalazišče, kak rečimo Jurski park, a ja bi rajše da su došli zato kaj im falimo i vole nas. Zgledi da je zanima kak smo staro z novim kombinerali; navuku i informacije kaj do njih moremo z tradicijum i znanjem naših stareših. Na Gugleku sem taki prečitala kak su Baby Boomersi⁵ perva generacija žitela koja ne čuvle nasleđe. Bi reči, moja i Jožekova čkomeča⁴ generacija pojde na počinek, a naša deca nečeju naše tanjere, prelepi ručni rad i vse kaj sme čuvali za nje kak najvekše bogactvo. Mi preveč dugo hodimo po svetu, i deca su nam več ostarela; došli su k pameti, vse im menše sega treba.

Linda je v stare letne kuvinje našla svete slike kaj su bile po našim stenami u vreme pretekloga orsaga, gda sme vsi bili ateisti. Kad smo se vrnuli v kapitalizem, svece kaj su nam je ciganke prodavale od hiže do hiže smo skidali ze zida. One su tržile z svecima po selima, slično kak rajzkramari z vusisavačima i enciklopedijam v stare Amerike, denes Trumperike. Za misliti, oni su več onda imeli vešmašine a ja sem si reuma-pemziju drukala na poteku klofajuči veš. Po zime Ledenoga doba, rečimo.

Za ozbilno pračenje kulturne antropologije v našemu prelepomu Gornjemu Moslavačkomu Selu pustili smo decu na tavan naj do mile volje zučavleju kak se ranimo v Štalske ere, tu Bogu za plečima. Mileni navek ima kebu v žepu, ga je dedek tomu navčil dok je bil mali. Tak su mogli pristupiti navukovanju o belim kobasam i suhomu špeku. Spentrala sam se na vrh lotre i pružila im deščicu z mladim lukom srebrencom z vrta, am je još rasel na te deščice, i teplim, reš pečenim kruvekom z krušne peči. Dišal je kaj raj. Naj se vžijeju Štalskoga doba.

Študiram si kak je bokcima kaj tavana v stanu nemaju, ni šupu, ni letnu kuvinju, ni podruma, kleticu, brajde z grozdjem, vrčaka, štalicu, friško mlekeco i jajce... Deca misle da jajca v zelju rasteju. Gda sem svojemu gazde zložila kak te problem rešiti, čula sem svoje: „Je, ti si prava pravcata selska Guglekica. Buš popravila vse na tom svetu kaj po tvojemu ni kak se spada. I Afriku buš pokrpala, am su joj se šavi rasparali!“ A ja, same mahnem z rukum. Gda dedi klopočeju to je kak propuh; črez jeno vuho nuter, čer drugo vun. Vredi za sve ere, od špilske do virtualne.

_______________________________________________________________________

¹demografska skupina ljudi rođena između 1981. i 1996. godine

²morski tjesnac u gradu New Yorku

³Kulturna antropologija usmjerena je na proučavanje kulture kao razvojne i dinamične kategorije u vremenskim i prostornim zbivanjima te uzajamno prožimanje procesa enkulturacije i generacijskoga prenošenja kulturnih vrjednota s procesima akulturacije i progresivnoga stvaralaštva.

Citiranje: kulturna antropologija. Hrvatska enciklopedija, mrežno izdanje. Leksikografski zavod Miroslav Krleža, 2013. – 2026. Pristupljeno 29.8.2026. <https://www.enciklopedija.hr/clanak/kulturna-antropologija>.

⁴demografska skupina ljudi rođena između 1928. i 1945. godine

⁵demografska skupina ljudi rođena između 1946. i 1964. godine.

________________________________________________________________________

Manje poznate riječi: pleča – leđa; ajnpidekl (njem. Einpackdeckel) – tradicionalni jastuk za nošenje novorođenčadi; huncutarija – nestašluk; plajbasek – olovčica; puntarija – buna; funduš – okućnica; napoj – ostaci hrane, hrana za svinje; obeltinje – oguljene ljuske voća i povrća; oblupiti – oguliti; klepka – zvono za kravu; pen – panj; husta – šuma; pretekli orsag – bivša država; rajztržec – trgovački putnik; spentrati se – popeti se; lotra – ljestve; zložiti – predložiti; klopotati – brbljati.