Kajkavsko najže (10): Vejača drvenjača

Piše: Aleksandar Horvat

Zanimlivo! Gda čovek skorom pozabi na sneg, on najemput padne. I onda mu se čudimo, mi stari koji smo ga dugo ne vidli i deca koja su ga ne vidla nigdar. Sneg donese veselje onima kaj rad imaju lepe bele vidike, ali donese i drvlje i kamenje po ralicama, zimskim službama i sima koji bi po tomu snegu trebali nekaj delati. A si smo malo pogubleni kajri ne znamo nidi gde su sani, rukavice, kape, šali, čižme, se je to negdi pospravleno kajti je dugo ne bilo v upotrebi.

Za obične živeče ljude se zna - pred svojom hižom snega treba odmetati, kaj budu si koji ideju peške mogli lepo i sigurno iti po svojim putima i za svojim poslom. Znam da je negdi v garaži bila moja stara lopata kaj sam ju kupil pred par let. Plastična, ne baš bog zna kaj. A ova moja je plus toga malo bila napokla. I naravski, kak sam zagrabil malo na stranu, raščehnula se je v sekundi, još su me niti pošteno ne počela križa boleti od prekratkoga štila. Tu sam spoznal da su se štacunari isto tak čudili snegu kak i mi starci i deca. Novu lopatu nemaš za kupiti nigdi.

Ali, zmislil sam se da v mojim premetavanjima po najži, da sam negdi videl spasa. Negdi pod gredom mora biti zateknuta - vejača. Kakva je to sjajna stvar! Znam za vejaču od kak sam bil mali drišlavec, saka hiža v selu pri moji baki je imela jenu. Rekli bi - drvena lopata. Ali gle, neje to baš samo tak. V ono vreme gda su vejače bile “moraš ju imeti“ produkt, po svetu su hodali Cigani koritari. Rekli bi jeni da ne smeti tak grdo govoriti, ali gleč, tak je. Jen je njihov rekel, kak sam prečital v nekakvim zapisima: „Romi, to su ovi bogati z žulencijama i penezima, mi smo obični Cigani”.

Nešče se zmisli, nešče ne, da su njihove žene navek nosile decu v malomu drvenomu koritu, pod miškom. A Cigani koritari su bili maheri za te drvene stvari. Samo če bi se domogli kakvoga topolovoga, vrbovoga ili lipovoga trupca. Mefko drevo, lefko za delati, i za nositi. Od toga jenoga trupca napravili bi, ili „skopali”, drvena korita, vejače, od krajših komadov struganjke, a če je kaj ostalo, zišla je još i lopatka za brašno za mlinara (kak vejača ali menša), a od preostaloga droptinja kuhače i veslice. Se se je potrošilo. I tak su koritari kak nomadi hodali po svetu i - delajuči drvene stvari za po doma - nekaj bi zaslužili, za kupiti ono kaj su ne mogli „nabaviti”.

E, vejača! Za vejaču fnogi misliju da je to lopata za sneg. A ona je zapravo lopata za čistiti žito od pleve. Ime je dobila po reči vejati ili vijati (a koja se vleče još od staroslavenskoga), kak se reče dok veter raznaša snežne pahulke, pak onda imamo vejavicu ili vijavicu. Z tom bi se lopatom zagrabilo žito i hitilo malo v zrak gda je puhal veter. Zrnje bi kak težeše palo nazaj na plahtu, a plevu bi veter odnesel na stranu. A gda bi pala zima, onda je vejača bila čist dobra i za snega odmetati. Zakaj bi stala bez posla negdi obešena celo leto do drugoga žita.

Za vejaču je važno da je to lopata z jednoga celoga komada dreva, zdublena tam gde se grabi, a stenšana v štil tam gde se drži. Nesu koritari imeli čas sušiti drevo kaj bi dobili dobroga materijala. Zdubli bi oni i friško zrušeno. A takva je bila i ova moja. Gda su ju napravili, pred jedno osamdeset let, bila je sigurno slika i prilika, kaj z fabrike. Ali vreme je doneslo svoje, drevo se sušilo, pak je štil zišel malo zavijeni na levo. Gda zagrabiš snega i taman bi ga hitil na kup, se skupa se prehiti, zasukne ti ruku, zacukne te v križima, pak se zmisliš i koritara koji ju je delal i pokojnoga dede koji ju je naručil.

Dobro, pomogla je ova vejača da se zbavi građanska dužnost, a kak je sneg po običaju okopnil i morti se više ne misli vrnuti, zateknul sam ju nazaj pod gredu. Sikak je to ručni rad koji ima tradicijsku vrednost, saka je vejača za sebe, unikat kakvoga više nema. Žito nemam, ali nek bu tu na najži, nikomu ne smeta, a za sneg nigdar ne znamo gda bu pak opal.

Kak i koritari, on dojde, napravi kak napravi i odide.

(A. Horvat, 1/2026.)