Eda Budić | Torta od pira

Zvono,Oče nas i De profundis

čuje se-kako i toliki puti-nabot.

Ljudi gledaju rože i rodbino.

Na sredine kolone

ona zapire oči

i ćuti miris ruma i kafe,

na zajiku in se topi

starinska torta puna urehi.

Potle kvarat stoljeća

vidi je,

bielo torto na tri kati

puno rožic od fine biele kreme

i mićeh srebrneh perlic.

Na vrhu dva pupulotića

ka se stišću .

Ni sigura da je pokojene zahvalila

ča in je,kako i tolikemi drugemi,

cukerala novi početak.

I ča je cieli život kazala

kako bit prava šinjora

i prava gospa.

_____________________________

nabot-istovremeno

urehi-orasi

kvarat-četvrt

pupulotić-lutkica

cukerat-zašećeriti

kazat-pokazivati