Irena Matijević | Čovik - stina

U plamen Plame pritvorene,
Bori, poja, masline izgorene,
Trudi i lavuri u lug se pritvorili
Vino, smokve i uje nestali, izgorili.

Sulari od stinja stojidu
Prkosidu, ognja se ne bojidu.
Na njiman judi sididu
Po nebu kanadere brojidu.

Naučni na sušu i svaku nevoju
Gledaju u ognju muku svoju.
Žujave ruke u krilu kršidu,
Gledaju, uzdišu i mučidu.

Oni su, ko stina na kojon stojidu
Sušne dane bez kiše brojidu.
Ono ča je ostalo,
sad je u plamenu nestalo.

       ************

Čovik na stini, stina u čoviku, ni glasa ni suze, samo stina na stini.