Božica Jelušić | Božićna slama

Gda donesli su slamu, v hiži bilo je zlatno.
Petrolejka i sveča kolobare su splele.
Batič je kucal vredno i zibalo se klatno,
I dišalo je nekaj na stolu z cinčane zdele.

Japa je slamu razgrnul i zmolil Očenaša.
Sema je „Dober večer“ rekel; i deci i mačku.
Zamotala se večer kak v testu prosena kaša,
Ajngel je z bora spustil nit svetlu i dugačku.

Do polnočke su rekli da nikaj ne bumo jeli,
Popevali smo samo, zbirali slamke hržene,
I mislili na žito kaj k letu bumo ga želi,
I na cula i vreče z nulerom napunjene.

V noči smo išli po snegu , zabundrani v rupce,
Cirkva kak košnica brni, a mi smo čmele.
Mali je bratec najemput v zapuh opal nazupce,
I svet je bil od vate i od kudelje bele.

Japa je zginul zdavna, kak i navade stare.
Fletno su prešla leta, na nebo otišla slama.
Al' nešče se još zmisli na te deteče dare:
Božič je k nama došel, Jezušek igral se z nama.

Božica Jelušić
Foto: podravske-sirine.com.hr