Željko Bilankov | Pa je snig

(dvadesetdeveta kratka priča pisana pretežno šoltanskim dijalektom)

Jo, ča san se obradova snigu. Brž mi je bilo šest godin, kad su, na moju sriću, jednega ladnega dana zabilile pahuje našin spli'skin kvarton. Tad smo živili u Kninskoj ulici, na broju tri, ka sustanari, u prizemju visoke bile kuće iza crikve Gospe od zdravja. Kad bi gleda vanka kroz velu ponistru od sobe, parilo je deboto ka da si u dvoru. Tako san se i sad, nasmijan i uzbuđen namisti isprid nje, dok mi je mater, isto tako sritna, pribacila ruku priko ramena, a snig je, na naše silno zadovojstvo, pada i pada, sve višje i gušće prekrivajući cili dvor. Vela kamena klupa posrid njega, ubrzo je dobila meki pokrivač od netaknutog sniga.

To je u našen kraju bila prava ritkost i sad su mnogi, pa tako i mi, molili Boga da dobro napade i ostane ča duže. Nisan moga mirovat, nego san natira mater da mi otvori ponistru, kako bi barenko bokunić pahujic čapa u ruke. Ma, uletile su one u sobu i mami se uplele u kosu, a meni močile lice, dok san ih žmireć vata, ručican uperenin uvis. Čin je, na moju velu tugu, zatvorila caklo, pobiga san u kujnu, pače zahod, jerbo je tamo bila otvorena ponistrica sa tri gvozdene šipke, a koja je isto gledala u dvor. Razumi san mater, bojala se da me ne uvati grlo po vakoj 'ladnoći, ali kako odolit, a da još malo ne poćirin vanka. Mejuto, onako mali, mora san se na ništo uspeć, pa mi je dobro doša niki sanduk, kako bi moga vidit blagodati tega vrimena.

Na moje velo iznenađenje ugleda san oca u dvoru sa nikin judima. Misli san, ili je uteka sa posla ili je doša na marendu, jerbo je tu blizu radi u knjižari. Hlihlišćali su se, gacali i vajali po friško napadanon snigu ka da su dica, a bome tata i ni bi star, jema je svega tristidvi godine, makar su i puno stariji pustili sebi na voju da guštaju u toliko žejenoj biloj radosti. Ako bi načas utihnuli njiovi glasovi, parilo mi se da čujen prigušeni zvuk krhkih pahuji koje tako lako klize kroz zrak, stapajući se sa podon našega dvora. Inšoma, odluči san zazvat oca, zbog silne žeje da mi makar malo sniga doda kroz ponistricu, kako bi smiri svoje ustreptalo srdašce. Puknu je od smiha kad me vidi odakle ga zoven i da san glavu skoro provuka izmeju dva gvozda. 

Ni pet ni šest, a on se okrene i sa rukavon od mantela jedne ruke zagrabi snig sa klupe i uz pomoć druge ponese ga prima meni. Ajmeee, a ušto ću ga stavit. Trepjen na sanduku, a eto ti mame i kad je vidila ča se zbiva, ni mogla, a da se i ona ne nasmije, dok je mahala glavon i govorila, kako je otac luđi od mene! S'vatila je sve i evo je začas sa nikon staron tećon u ruci. Obadvoje su se cerili, ali su mi i pomogli, on izvanka, a ona iznutra, da smistin većinu sniga u ti sud, koju san čvrsto drža s obe dvi ruke. 

Ne sićan se, jeli otac odma poza tin doša u stan ili je osta vanka sa sviton, ali znan da san, uz pomoć matere, teću punu sniga prini na stol. Parilo mi se kako nima sritnijeg diteta na svitu. I odluka je pala, napravit ću snješka doma, pa koliko traja da traja. Ni prošlo puno vrimena, a već san ga formira u ton staron sudu, uz malu pomoć mame, štrapajuć nemilice uokolo. Prvo trup s rukan, pa grudu od glave i onda je posadi na tilo. Kapa od igraške dimnjačara, dva vela zrna papra bile su oči, mejuto tako male karote za nos nisan jema. Zato mi je čačkalica došla ka naručena. Dil za nos, komadić za justa i mali smišni ledeni čovik bi je gotov. Nisan ga se moga nagledat, a i majka me hvalila, zagrlila i pojubila u obraščić. 

Nažalost, temperatura u stanu i jednostavno vik trajanja radili su protiv mojega snigovića. Da ni bilo straha kako ću se razbolit, vanka bi siguro napravi većega i otpornijeg s obzirom na vridnosti oko nule, no ča san moga. Ovako, sa svakon kapjicon topjenja snješka, oči su mi bile sve tužnije i pune suz. Ma, snig se ni puno zadrža ni u dvoru, na razočaranje judi koji su ga jedva dočekali. Često je tako bilo i poslin, jerbo bi kod nas u Sridnjoj Dalmaciji, pogotovo u Splitu, ka uostalom i u novije doba, uz časne iznimke, ostaja najviše dan-dva. 

Mejuto, dvi godine poslin, kad smo se priselili u novi stan na Mažuranićevon šetalištu, cipa je ka lud. Mater, otac i ja u sridi, tišćali smo se zajedno i jedva koračali uzbrdo, kroz smetove sniga, dok su nas krupne pahuje, nošene grubin vitron zasipali bez pristanka. Pamtin, kako san kroz snižnu neveru nazira tek žuta svitla visokih uličnih svital, koja su nan poput lanterni pokazivala put prima našoj kući. Nažalost i ta moja srića ča ovako pada, s velon virovatnosti da će se duže zadržat, bila je pomućena plačen. Naime, jedan od nikih mulac koji su divjali s druge strane ceste, pogodi je mamu grudon sniga. Po njezinin ričima, u grudi je bi komad stine. Otac nervozan i grintav, prvenstveno zbog nevrimena, tira nas je naprid, ne virujuć uplakanoj materi, uz ono poznato: „Ajdeee, ni ti ništa, ča cmizdriš, pa ča ako su te pogodili!!!“. 

Poslin san tiši i čuva mater, koja je na jabučicu lica morala stavjat obloge, a otac se pokunji, jerbo je zna da je fali, ali ni ti priznat. Zato san, nakon puno godin, kad je pa veli snig i zadrža se danima u Splitu, bi stalno vanka i gušta u raznin čarolijan koje pahuje mogu stvorit. Iako san u životu, tek na trenutke ositi tak'i ugođaj, žeja za snigon i svin mogućin zimskin radostiman, posebno skijanjen, nikad ni prestala i uvik je ostala moj davni neispunjeni san!